林明禎強調現階段以事業為主 化身文青女神預告即將出新歌

大馬女神 林明禎 現身活動，被傳媒逼供佢同MIRROR成員Edan呂爵安嘅緋聞，面對男方高調示愛，明禎相對保守，僅以「朋友」形容兩人關係。相隔一日明禎再出席公開活動，吸引唔少粉絲到場支持，對於感情事，明禎再次強調同Edan只係朋友，現階段重心依然以事業為主。

林明禎爆出緋聞後再出席公開活動
呢日明禎著住純白貼身長裙，戴住粗框眼鏡，搖身一變成為文青女神。佢話2月喺米蘭時裝周感染Covid，之後因為身體不適，停工返大馬休養，期間仲見證細佬成家立室，明禎話雖然細佬仲好年輕，不過都係經過深思熟慮先決定步入婚姻，所以佢都好祝福。
早前佢見證細佬娶老婆

原本以為明禎返大馬休養會有多啲時間陪屋企人，估唔到明禎話反而少咗見面，因為佢忙於籌備新歌，又要錄音，又要學跳舞，相當忙碌。明禎話嚟緊希望將工作重心擺喺歌唱方面，因為始終自己係以歌手身分出道，希望好快可以有首新歌，答謝粉絲10年來嘅支持。

呢日又指工作重心將集喺歌唱方面