吳君如中秋率劇組到戲院謝票 期待到夏威夷電影節

由 吳君如 同 MC張天賦 主演嘅新片《我談的那場戀愛》，截至15號上映四日，累積票房衝破300萬，同時連奪四日單日票房冠軍。為答謝觀眾嘅支持，君如將會喺9月17、18日期間，聯同劇組一同現身戲院謝票，與影迷共度中秋佳節。

《我談的那場戀愛》四日累積票房衝破 300 萬。
另外，電影早前獲邀參展下月初舉行嘅第44屆夏威夷國際電影節「聚焦香港」單元，君如更獲頒發夏威夷國際電影節「焦點香港」影人獎 (HIFF SPOTLIGHT ON HONG KONG FILMMAKER IN PROFILE AWARD)，以表揚君如對影壇嘅卓越貢獻及傑出成就，佢亦係繼王家衛及關錦鵬導演後，再獲此殊榮嘅電影人。
吳君如將會飛到夏威夷出席電影節。
對此，將會飛抵當地接受榮譽嘅君如表示非常開心：「接到這個消息真係又驚訝又驚喜，而家呢部戲咁好口碑，咁可以去到夏威夷同人交流時都更加得心應手！」君如之前已經帶住電影去到各地參與影展，海外觀眾同樣非常鍾意呢套作品，所以君如期待夏威夷觀眾嘅反應：「電影題材講詐騙講愛情，尤其詐騙題目而家咁具爭議性，相信會引起唔少討論。」

未曾去過夏威夷嘅君如，透露對此行充滿期待，希望喺完成工作後可以四周遊歷下，又笑言可以試吓當地人嘅著法：「著住兩個椰子殼跳吓草裙舞，哈哈，話唔定仲可以影啲靚相返嚟畀大家睇下！」
有份演出嘅張錦程屆時亦會出席謝票。
提到中秋節嘅謝票活動，君如興奮表示：「我諗觀眾會送啲月餅畀我，期待有人送月餅啦，或者我送啲月餅畀觀眾都得！」而屆時，兩位監製陳慶嘉、秦小珍，導演何妙祺，以及有份演出嘅張錦程、Norman Noël、陳昭煊、何求、李煥林、陳章棨都將出席唔同場次嘅謝票活動。