公主苑瓊丹再升呢做科學家 致力科學研究想健康活多幾年

苑瓊丹今年年頭先開心宣布自己獲菲律賓政府冊封為穆斯林「公主」，仲搞笑話老公見到佢都要下跪請安。近日佢又有新身份，就係榮升「香港女科學家協會」副會長，日前仲喺會展舉行揭幕就職典禮。

苑瓊丹榮升「香港女科學家協會」副會長，日前仲喺會展舉行揭幕就職典禮。
苑仔利用科學方式，除去腐乳中嘅細菌，技術受到肯定：「近日香港嘅腐乳令到香港好失望，香港人好似冇咗手信，依家我地努力不懈，研發令到佢無菌，我地會搞呢啲研究。善用科學改善生活。」苑仔話自己由細到大都冇諗過會同科學家沾上關係，實際接觸之後先發現呢啲嘢並非遙不可及，仲話希望利用科學方法令自己健健康康活多幾年。

苑仔利用科學方式，除去腐乳中嘅細菌，技術受到肯定。
交遊廣闊嘅苑仔榮升副會長，好友林子聰都有到場慶賀，仲滿場飛四圍送禮猶如男主人，苑仔講笑話之前林子聰搵自己做女主角，搞到票房唔收得，所以自己唯有「氹掂」林子聰做直播齊齊搵真銀！

苑仔剛剛渡過生日同結婚周年紀念，不過佢就忙到冇時間慶祝。
苑仔剛剛渡過生日同結婚周年紀念，不過佢就忙到冇時間慶祝：「依家幾十歲唔使慶祝，最緊要家和萬事興、身體健康！我都唔知結婚二十周年添，真係快樂不知時日過，證明我婚姻生活係美滿嘅。」不過呢日見到苑仔手臂有明顯瘀痕，唔通係家暴事件？原來苑仔忙於做生意同直播，搞到周身傷，早前趁休息時間去通經絡，笑言絕對冇被老公「家暴」。