劉德華新戲攜手莫文蔚對抗輻災 前導海報曝光香港淪末日廢墟

由兩屆金像獎最佳攝影潘耀明執導，劉德華、莫文蔚主演，香港史上首部以輻射災難為題材嘅電影《焚城》，電影前導海報及多張概念海報正式登場，當中見到香港多區受輻射淪為廢墟，畫面令人震撼。

香港史上首部以輻射災難為題材嘅電影《焚城》。
海報中兩名穿著保護衣嘅消防員，企喺被輻射摧殘嘅旺角彌敦道街頭，上空籠罩濃厚嘅末日氣息，彷彿整個香港已成廢墟。而多張概念海報一如末日寓言，天壇大佛、中環香港匯豐總行大廈、尖沙咀鐘樓等香港地標，喺輻射蹂躪下頓成廢墟，充滿末世氣氛。

電影《焚城》係華仔同Karen自《童夢奇緣》後時隔19年再次合作，兩人戲中有大量火藥味十足嘅對手戲。
預告片一開場交待粉嶺回收場發生輻射洩漏，災難迅速擴散全港，消防員深入危險現場救災。戲中飾演環保專家嘅劉德華、高官莫文蔚、以及白宇、謝君豪、王菀之、林保怡等主演逐一現身，而王丹妮、廖子妤等人嘅消防員造型，亦喺預告中初次曝光。災難當前眾人神情繃緊，華仔更頹然落淚，究竟輻災會否吞噬成個香港？

戲中飾演環保專家嘅劉德華、高官莫文蔚、以及白宇、謝君豪、王菀之、林保怡等主演逐一現身。
另一支預告片中，白宇飾演嘅消防隊長黎杰峰，帶領一眾手足去到前線拯救生命，並要喺24小時內尋找輻射源頭，力阻災難波及全港。環保專家范偉立（劉德華 飾）同代理特首Cecilia（莫文蔚 飾）率領嘅緊急危機應變小組，負責策劃救災計劃，然而眾人立場分歧，華仔嘅角色喺戲中同多名高官針峰相對，互不相讓。並講出一句震撼人心嘅台詞「你真的連一個逃生的機會都不給他們嗎？」

見到香港多區受輻射淪為廢墟，畫面令人震撼。
值得一提嘅係，電影《焚城》係華仔同Karen自《童夢奇緣》後時隔19年再次合作，兩人戲中有大量火藥味十足嘅對手戲，令Karen直呼過足戲癮。