我推的野男LIVE！｜組隊對壘一對一決鬥 「巨胸林子善」Cash慘被淘汰

胡蓓蔚 支嚳儀 火火 同 陸浩明 主持嘅《我推的野男LIVE！》，4組野男今個星期開始進行一對一對壘，每晚比賽三場遊戲，每場落敗一隊會有一名隊員跌入「水深火熱區」，人選仲係由勝方事先決定。

節目開始前兩隊會以「死亡筆記」形式，寫下對方嘅淘汰人選同順序。比賽完結就會舉行熱度測試，最低分者將被永久淘汰。

星期一晚率先登場嘅兩隊，分別係「幼齒張家輝」8號李健禧(William)領軍嘅 「胸猛隊」同「筋肉霆鋒」2號關經翰(Oswald)帶領嘅「顏值隊」。現場嘉賓 龔嘉欣 同 譚凱琪 接受豹嫂訪問時表現雀躍，龔嘉欣話︰「難得出現綜藝節目，梗係有個好重要任務。因為有朋友同我講好鍾意Ron（11號），所以要支持佢。」

譚凱琪亦直言非常開心，仲笑言︰「平時係隔住個Mon，今日可以見到真人、真身，係好興奮。」仲話特別留意「顏值隊」隊長Oswald「筋肉霆鋒」︰ 「因為我知道佢係體操王子，我希望囡囡都可以玩體操，所以我係有私心嘅。」
龔嘉欣同譚凱琪喺星期一現身《野男》現場欣賞節目

「胸猛隊」由隊長8號李健禧（William）「幼齒張家輝」帶領4號吳宇軒(Eric)、7 號顏英豪(Cash)「46吋巨胸林子善」同11號鄧家朗(Ron)「激凸Chilam」出場，仲齊齊染上一頭銀髮以示團隊精神。

對手「顏值隊」就由隊長2號關經翰(Oswald)「筋肉霆鋒」引領1號李清杰(Uclean)「魔鬼筋肉男」、3號施顯澍(Austin)「野男Rain」同22號伍家豪(Ivan)「雙節棍野男」出場。
各隊成員一對一決戰，比賽競爭白熱化

首場比賽「連環轟炸攻守戰」要求限時內將健身球、沙包拋到對方陣地，半場內總重量較輕一隊獲勝。雖然「顏值隊」事前定好策略，集中所有重量，於最後時間內拋到對方陣地，讓對手未及反擊。但喺7號Cash「46吋巨胸林子善」同11號 Ron「激凸Chilam」全力反擊下，最終「顏值隊」敗陣，1號Uclean「魔鬼筋肉男」進入「水深火熱區」。

第二場比賽「團魂之巔過河戰」佢哋要移動重約30公斤嘅木樁作躉，搬運健身球到投射區射籃。「顏值隊」憑準確射術成功追回一局，對手7號Cash「46吋巨胸林子善」墮入「水深火熱區」。
隊員仲預先為對手留低「死亡筆記」

最後一場「反轉巨輪極限戰」，1號Uclean「魔鬼筋肉男」展現絕對力量，令「胸猛隊」再輸一局，11號Ron「激凸Chilam」成為犧牲者。最後環節熱度測試， 7號Cash「46吋巨胸林子善」熱度不及其餘兩位，成為組隊後首名出局野男。今晚節目「智齒隊」將惡鬥「狼虎隊」，絕對不容錯過。

《我推的野男LIVE！》 星期一晚 21:30、星期二晚 21:35 TVB Plus