草蜢三藩市巡唱三缺一 蔡一傑因病缺席未能同行

草蜢 日前喺美國三藩市舉行一連兩場巡迴演唱會，美中不足之處係蔡一傑因病未能同行參與演出，但絕對無影響演唱會氣氛，蔡一智同蘇志威傾盡全力跳唱，仲承諾下次會齊人同大家見面，阿智話「雖然我哋三缺一，不過美國嘅朋友一樣咁支持我哋。相信傑仔知道咗一定舒服晒，等佢休養完，下次再返嚟美國同大家見面，到時一定會玩得更開心。」

草蜢早前到三藩市舉行巡迴演唱，不過蔡一傑就因病缺席

阿智同蘇老闆繼續為歌迷落力演出
由於今次演出三缺一，阿智同蘇老闆到埗後就爭取時間綵排，未有外出遊覽，蘇老闆話「到咗酒店就困自己喺房唔出去，養精蓄銳。始終三缺一，走位同埋啲歌要重新編排，一落機就喺酒店備戰，冇出過去，唯有落去跑步同健身。」阿智笑指有去咗酒店房、酒店房廁所，仲有自己間房望出去風景好靚。

佢哋又話希望盡快有機會為當地歌迷三位一體再次演出