無窮之路IV｜治安意外成拍攝棘手難題 罕獲准拍攝麥加朝聖情況

無綫新聞 攝製隊同 陳貝兒 花費無數精神、時間同體力拍攝嘅 《無窮之路IV-一帶一路》今晚將率先播出半小時製作特輯。

攝製隊用咗兩個月時間，先後走訪馬達加斯加、埃及、希臘、塞爾維亞、沙特阿拉伯、阿聯酋同肯尼亞七個一帶一路沿線國家拍攝。攝製隊今次繼續要面對重重困難，除咗早前提及過嘅「高溫」同「抵抗力」難關，攝製隊仲要面對「無預警意外」同「治安」兩大挑戰。
陳貝兒同新聞部攝製隊歷時兩個月到七國拍攝《無窮之路IV-一帶一路》

攝製隊採訪嘅馬達加斯加，係全球十大最貧窮國家之一，該處連一支紅綠燈都冇，四處可見交通警駐場人肉指揮交通；攝製隊走訪當地市集，發現由於當地民眾「未必夠錢成包買」，故好多日常用品，包括衛生巾等都係拆開逐件出售。
馬達加斯加經濟欠佳，連必需品都要購買散裝

主持陳貝兒（Janis）坦言拍攝期間「步步驚心」，透露每次攝製隊以攝影器材拍攝，都感覺到有隨時被搶劫嘅危機。為保護攝製隊 《無窮之路IV》嘅內地項目組，聘請兩名荷槍實彈嘅憲兵同行護駕。
因有遇劫風險，於當地拍攝時有兩名荷槍軍人沿途戒備

而眾人於肯尼亞貧民窟拍攝期間，以小型相機四出拍攝嘅攝影師，遭流浪狗突如其來撲出咬 傷兼流血，由於現場衛生環境極差，團隊即時擱置拍攝並馬上將受傷攝影師送院接受治療，前後共注射四支狂犬病疫苗，Janis憶述當時情景時仍猶有餘悸。
攝影師於肯尼亞拍攝時不幸被狗咬傷，需送院打狂犬病疫苗以防萬一

雖然拍攝旅程一波多折，不過攝製隊最終依然為觀眾紀錄唔少珍貴畫面，當中部份更係激罕開放予電視台拍攝！好似一年一度嘅宗教盛事—麥加朝聖，每年都吸引過百萬虔誠穆斯林教徒從四面八方遠道參與，而且一直都唔開放採訪。

為帶觀眾一睹神聖又大型嘅歷史性畫面，攝製隊幾經辛苦成功申請；以工作人員身份現場見證呢件國際級宗教盛事。另外攝製隊亦見證兩項大型超級基建，分別係難得對外開放予傳媒拍攝；位於波斯灣皇家海域嘅造島神器「天鯤號」，以及過萬噸醫療艦—中國海軍和平方舟號。
罕有公開拍攝嘅島神器「天鯤號」

「天鯤號」係內地第一艘完全自主設計建造嘅重型自航絞吸挖泥船，每小時挖泥量足足有6000 立方公尺，1小時就可以將一個標準足球場挖深1公尺，被譽為係 「大國重器」。Janis 喺節目中將登上呢艘長140米、寬27.8米同深9米嘅超大型造島神器，同大家一齊見識「天鯤號」嘅日常操作，又會訪問船上工作人員。
《無窮之路IV-一帶一路》今晚播出製作特輯同幕後花絮

《無窮之路IV-一帶一路》製作特輯 今晚 22:00 翡翠台

《無窮之路IV-一帶一路》 10月6日起 逢星期日晚 22:00 翡翠台