周殷廷展開一年School Tour 返回去年勉勵學生中學作起點

周殷廷 展開為期一年嘅School Tour義演，鼓勵一眾莘莘學子勇敢面對困難。YT話呢個義演計劃，源自一年前收到一間中學老師電郵，話有位女學生唔想讀書，除非YT叫佢先肯讀，當時YT真係去到學校鼓勵女學生，之後YT喺另一活動見到呢位女學生，仲知道佢考上大學。

周殷廷早前展開佢嘅School Tour義演，勉勵唔同學校嘅同學
YT覺得呢件事令佢明白一句說話可以咁有力量，所以決定展開義演，仲揀番一年前探訪嘅中學開始首站，最開心係嗰位女同學都有出現，而YT仲邀請校長上台合唱。
YT呢日仲同校長齊齊合唱

YT以自身經歷同現場150位同學分享，佢話自己最低潮係不停被唱片公司拒絕，但係佢覺得只要克服咗內心恐懼，就可以勇敢去面對困難。佢又話雖然自己不時傳播正能量，但內心都有陰暗面，佢會選擇坦承面對去反省溝通，因為逃避就會遇到挫敗而產生怨恨。

演藝路並唔順利嘅YT，希望將自己經驗同大家分享