StarTalk一氣呵成版｜五女神食勻港深珠大小食肆 橫掃各地秀怡個人技獲封號

疫情之後大家紛紛出遊消費，除咗講到口水乾嘅深圳同珠海齊齊出招「搶人財」之外，本地小店都一樣需要大家支持，5位高顏值又同時食量嚇你一跳嘅吃貨女神 廖慧儀 梁凱晴 梁超怡 林秀怡 同 彭慧中 就喺《吃貨橫掃港深珠》帶大家食盡玩盡三地，呢日佢哋接受 詹可琳 《StarTalk》專訪，就分享拍攝時嘅好笑開心事喇。

五位吃貨女神食勻香港、深圳同珠海唔同特色食肆

中西口味全部網羅
所謂民以食為先， 一講到食就男女老幼各有所好，秀怡就對香港一餐全蟹宴同傳統粵菜印象最深刻喇。而Jessica就對一煲冶味街頭煲仔飯最為回味，仲話深夜凌晨都一樣有得嘆。Joey就偏好一間打卡一流又集合亞洲各地菜色嘅香港餐廳情有獨鍾，Phoebe則對一間超值買一送一自助餐至Like喎。至於Carina原來係牛魔王，地道打邊爐佢一講起都流口水呀。
Jessica對一間香港特色煲仔飯最印象深刻

女士除咗注重味道，儀式感同氛圍都一樣唔少得，Phoebe就對深圳一間山林Cafe至欣賞。秀怡就對一味泥煨雞大為讚賞，唔止造法特別亦充滿風味咁話。

節目除咗介紹美食之外，仲有唔少特別好去處，好似Jessica就喺一間Cafe化物美人魚暢泳曬身材，佢哋仲有機會乘搭直昇機高空環繞欣賞美景。
秀怡拍攝後被幾位拍檔冠以「一口秀怡」稱號

其中秀怡就被大家推舉為吃貨之霸，仲被大家冠名佢係「一口秀怡」，因為無論係幾大啖嘅食物，佢都有辦法一口鯨吞，而佢就有個人見解喇。女藝人要拍飲食節目同時又要管理身材，要日日狂食拍攝真係一大難題，不過討論就發展到秀怡嫌自己唔夠Fit，而節目中佢哋仲會齊齊泳裝上陣騷Quali呀。