Fans包場睇新戲伍允龍突擊現身 逐一自拍感激支持證全片親身上陣

伍允龍 主演嘅新片《武替道》票房不俗，近日佢亦四出為新片宣傳，呢日有Fans包場嘅特別場，佢就特別現身為大家送驚喜喇。Philip啱啱先由歐洲返港，就即刻到場答謝大家，失驚無神衝入場嘅一刻，就令場內唔知情嘅Fans尖叫聲四起喇。

伍允龍突擊現身Fans包場場次，令大家都非常驚喜
雖然突然現身已經夠晒Fans開心，不過Philip仍即場加碼，為幸運兒送上簽名禮物，又同大家逐一自拍，不過發現其中一名Fans手機桌面唔係自己時，仲扮呷醋，展示佢平時較少見嘅幽默感。
Philip見到全場都係自己嘅忠實Fans非常高興

近年一吐烏氣憑好身手獲大家讚賞嘅Philip，又即場分享拍攝點滴同想法，Philip仲話非常感激大家支持自己同新作，仲話估唔到有咁多新面孔喜歡自己。片中有大量動作場面，Philip仲話自己嘅部份都堅持親身上陣，認為咁係對角色同影片嘅最大尊重。

又逐一同大家自拍留念
之後即趕往其他場次謝票

去完柏林同葡萄牙宣傳嘅佢，同行仲認識到新生代演員 袁澧林 同 盧鎮業 齊齊交流拍片之餘，仲拍攝咗一段功夫短片，好快就會喺網上公開咁話。

伍允龍日前先同袁澧林同盧鎮業到歐洲宣傳香港電影