眾星雲集釜山電影節開幕 宋仲基心情大靚風騷派心

亞洲影壇盛事第29屆釜山國際電影節隆重開幕，眾影星們盛裝赴會，當多位韓國男神登場時，現場均會出現歡呼聲，好似有池昌旭、李政宰、車勝元、姜東元等，榮升兩個小朋友爸爸嘅宋仲基，仲相當風騷邊行邊派心心。

宋仲基不停派心心。
而元祖男神張東健同新戲拍檔金喜愛、秀賢等一齊登場，秀賢雖然早前宣布離婚，不過仍無損佢嘅好心情，以超Deep V晚禮服上陣嘅佢相當性感。兩位人氣偶像TWICE嘅多賢與及B1A4嘅振永，以演員身份赴會，以女神裝登場嘅多賢，佢演出嘅處女電影、韓版嘅《那些年，我們一起追的女孩》更會喺影展中首映。

張東健、金喜愛 及 秀賢。人氣偶像TWICE嘅多賢與及B1A4嘅振永。池昌旭（左一）帥氣現身。

另外踏上紅地氈嘅仲有開幕式主持人朴寶英同安宰弘、少女時代嘅俞利、台灣女星楊謹華、啱啱入圍今屆金馬影后嘅夏于喬、入圍今屆金馬女配嘅楊貴媚。而擔任競賽單元新浪潮獎評審團委員嘅周冬雨，就以白色飄逸長裙look壓軸登場，呢次係冬雨繼《山楂樹之戀》後，相隔14年再踏足電影節。
楊愛瑾（右二）亦有現身。周冬雨擔任競賽單元新浪潮獎評審團委員。