李李仁投訴導演阿Ken精神分裂 嚴肅澄清與王陽明不和報導

溫昇豪 李李仁 范少勳 曾莞婷 林奕嵐 馬力歐 等合作嘅新劇《X！又是星期一》係阿Ken轉跑道做導演嘅處男作，由於係初次執導，所以阿Ken特別緊張，幾乎每場戲都會親自示範，搞到一眾演員都忍唔住要投訴。

阿Ken首次執導演筒，就被投訴太過緊張
李李仁話阿Ken好似精神分裂，一人分飾十幾個角色，將所有演員嘅戲份都演過一次，搞到大家好大壓力；溫昇豪就投訴話每次演完一場戲，阿Ken都會大讚話演得好，不過就要求來多次，但就講唔出要來多次嘅原因；至於曾莞婷就投訴導演無端端要佢講法文。
李李仁仲爆阿Ken好似精神分裂一樣

阿Ken雖然收到唔少投訴，但佢都係為套劇好，好似范少勳就大讚呢位導演好sweet，事關佢同林奕嵐拍攝落水戲嗰陣，阿Ken都著住救生衣陪佢地落水，而阿Ken就搞笑話，其實成件事都係自己嘅預謀，因為知道會成為新聞點，所以點都要落水咁話。

王陽明日前爆出失言風波，話比心心呢個動作太「娘炮」，引來唔少批評，更傳出佢嘅言論激嬲咗李李仁陶晶瑩兩公婆，導致友誼破裂，不過呢日李李仁就嚴肅鄭重澄清件事，話自己同Sunny係好好朋友，大讚Sunny對朋友有義氣，又話由頭至尾冇記者訪問過佢，成件事完全唔係事實，希望大家以後有咩事可以問佢求證先，唔好再亂咁報道啦！