徐少強夫婦先後辭世子女治喪 雪梨致祭李修賢憶半世紀友情

曾拍攝大量經典電視劇集嘅一代大俠 徐少強 上月初因為食道癌於北京離世，終年73歲，而比佢年輕30年嘅內地妻子 孟雨軒 事隔幾日後，辦理後事期間亦因心臟病辭世，事件傳出後令外界都對夫妻緊接斷魂而嘆息。

徐少強同太太孟雨軒9月初數日內分別離世
親屬5號於香港舉行家奠儀式，五名子女包括隨父後塵加入娛樂圈發展嘅一對兒女 徐偉棟 徐穎堃 都以主人家身份參與儀式。事後子女代表家人簡短感激各界，「相信經過今天的家奠追悼之後，家父徐少強及其妻子孟雨軒在天之靈經已深感安慰，徐府五子女特此再次感謝各界親友及傳媒的關愛。」
徐少強五名子女於紅磡舉行家奠儀式

而 成龍 陳國坤 呂頌賢 麥當傑 姚子羚 等大批圈中朋友亦送上花圈致意，早年因感情生變各行各路嘅 雪梨 ，呢日同家姐米雪都有現身靈堂致意。另外 關禮傑 吳毅將夫婦 陳子聰 彭懷安 曾志偉 程東 田啟文 丁文俊 與日前遇到交通意外嘅「神仙B」蔡堅成 駱應鈞 等都到場送別。

曾與徐少強相戀多年誕下一對子女嘅雪梨同家姐米雪亦到場致祭

唔少圈中好友到靈堂送別故友
同徐少強 相識數十載嘅 李修賢 更分享多年難忘相處片段，早於1971年相識嘅佢哋，多年來成為深交，不時都會相約見面。佢又指徐少強性格似足真大俠，性格豪爽嘅佢仲每次飯聚都必定埋單，又對身邊朋友非常慷慨。

相識逾50載嘅李修賢大讚徐少強有情有義

李修賢又指約兩個月前同徐少強最後一次見面，雖然好友早知佢帶病，不過當時佢精神不俗，又指佢堅持返北京就醫。佢又提到對老友病逝非常不捨，相識多年從未聽過對方表露負面情況，更隞調除咗徐少強之外，早前離世嘅馮克安、孟海都因為食道癌離世，所以特別呼籲大家要特別留意。