無窮之路IV｜深入馬達加斯加了解華援建發展中國護士長駐當地憾未見亡父

陳貝兒主持無綫新聞製作嘅全新一輯《無窮之路IV-一帶一路》今晚正式推出，首站攝製隊到訪被稱為世界上最後「挪亞方舟」嘅非洲國家馬達加斯加，呢個全球十大貧窮國家之一；亦係中非共建「一帶一路」嘅橋樑和樞紐。

自70年代開始，中國已經喺基建、農業、教育、醫療等各方面向馬達加斯加提供援助，Janis 仲藉2023年馬達加斯加政府發行嘅特別版郵票，訴說兩國之間嘅三個故事。
新一輯《無窮之路》以馬達加斯加嘅郵票展開

Janis同攝製隊去到被喻為係「雞蛋村」嘅馬哈扎扎鎮，分享首個故事「雞蛋路」。鎮內三分一人靠養雞同賣雞蛋維生；由於過往鎮內道路非常殘破，導致雞蛋運送時間長兼容易損毀，但自2018年一個國際會議，馬達加斯加總統向中方代表提及情況後，中方無償為馬哈扎扎鎮建設「雞蛋路」。

Janis節目中拜訪咗「雞蛋路」項目負責人袁方興，佢提及建設「雞蛋路」最大難處係同當地人溝通：「聽不懂他們說甚麼，他們也聽不懂我們在說甚麼。開工的時候，剛進來(原本)那條路根本不像是路，牛車基本上也沒法走。」經過多年努力，「雞蛋路」2022年正式通車，出市區路程由兩個多小時大減至十多分鐘，大大改善當地居民生活質素，仲吸引唔少情侶前往拍攝婚紗照！
雞蛋村對外道路建成，大幅改善居民生活同效率

第二站Janis就拜訪「雜交水稻之父」袁隆平院士嘅得力弟子胡月舫。以往馬達加斯加水稻產量極低，雖然有三分之二農田用以種水稻，但仍冇辦法令全國人民溫飽；2008年中國水稻專家胡月舫帶領團隊協助非洲人民解決主糧食短缺問題，經過多年努力，終成功培育出3種新水稻品種，Janis試食後仲大讚新品種米口味。

水稻專家於當地開發新品種，亦有助居民得到溫飽
胡月舫時提及喺馬達加斯加堅持努力多年，全憑一個信念：「我們現在還未完全達到(期望)結果，他們還有很多偏遠、沿海地區(的人)都沒飯吃，有的吃仙人掌、有啲甚至吃泥土，生活很苦。我們中國人看到這情況後都有惻隱之心，如果能幫他們解決吃飯問題，也是積德的事。」
Janis更試食胡月舫努力多年嘅成果