陳奐仁教聽爵士樂正確打開方式 黃洛妍盼有機會與Hanjin合作

陳奐仁 Hanjin 於5號夥拍爵士鋼琴家Ted Lo舉行15週年爵士音樂會，吸引到陳爽與老公，黃洛妍、陳晉軒、鄺星宇、徐嘉蔚等到場欣賞。身穿禮服登場嘅Hanjin，先為大家獻唱《I’ve got you under my skin》，之後佢同大家講起今次舉行音樂會嘅因由：「多謝大家出席，冇你哋冇今晚嘅演出。今晚係我出Raw Jazz大碟15周年，15年一眨眼就過。」
陳奐仁舉行15週年爵士音樂會。
音樂會上Hanjin不時與觀眾互動，又向教觀眾聽爵士樂時應有嘅反應：「唔明唔緊要，有人拍掌跟住拍就得。你哋可以尖叫，dum地。你哋舉高隻手跟住節奏揮。」觀眾們聽後亦隨即跟隨，令Hanjin不禁豎起姆指大讚大家夠配合。
睇相都覺得好Chill。

陳奐仁落台與觀眾互動。陳奐仁與爵士鋼琴家Ted Lo。
喺Encore環節，Hanjin獻唱Jazz版嘅《沒時間準備》，同時佢又再向觀眾進行Encore教學，指當年小鳳姐講過完美嘅Encore，係謝幕後佢哋返到後台，聽到觀眾齊聲大叫encore，歌手再感動出場，唱出觀眾鍾意嘅歌。
陳奐仁不時與大家互動。Encore時陳奐仁與Ted Lo扮感動扮喊。
當觀眾配合Hanjin嘅理想encore環節後，Hanjin再出場時感動扮喊：「多謝大家，我好感動。你哋真係好愛我。」又遞紙巾畀Ted Lo一齊扮感動喊，令全場爆笑，說罷就同觀眾大合唱《愛是懷疑》及《We've Only Just Begun》，Hanjin又承諾大家，希望明年再以爵士樂模式同大家見面。
  陳奐仁與樂手們。
久未露面嘅陳爽與老公拍拖捧場，陳爽表示自己鍾意聽爵士樂，平日同老公會喺屋企邊聽音樂邊飲酒，不過因為自己酒量麻麻，所以只會淺嘗，陳爽又指自己醉後會不停傻笑。黃洛妍當年參加《星夢傳奇2》時，Hanjin正係佢嗰組嘅音樂總監，所以呢次黃洛妍專程嚟支持對方，並表示希望將來有機會同台合作。
陳爽、黃洛妍圖左起：黃軍棠、陳晉軒、鄺星宇、陳爽、歌唱老師Kelvin、黃洛妍、添田宣和。