梁朝偉與劉嘉玲財政獨立 有意開拍電影拒與太太合

享受緊假期嘅梁朝偉，呢日就同太太劉嘉玲一同現身銀行理財活動，經已有一段時間無接拍香港廣告嘅偉仔，話今次遇到好信任嘅幕後團隊拍攝。講到理財習慣，偉仔就話自己唔擅長理財，所以都要交由專業人士打理，佢仲話以前賺到錢都會買下磚頭，但而家就唔太敢入市啦。

梁朝偉與太太劉嘉玲一同出席活動。

問到屋企條數係咪由太太管？偉仔就一口否應，仲話大家財政獨立，偉仔話去到而家呢個階段，接工作都唔係太考慮價錢，反而做得開唔開心先最重要。
梁朝偉早前同劉嘉玲重遊當年結婚之地 - 不丹。
嚟緊偉仔就要社東京電影節做評審團主席，而太太嘉玲就要演出舞台劇，佢哋早前趁投入工作前，兩夫妻就重遊結婚地不丹，偉仔話嗰度遠離煩囂，又可以親近大自然，感覺好舒服，而旅途中佢哋亦探望咗一啲老朋友，勾起好多難忘回憶。
偉仔表示自己創作緊故事，希望搵班底拍攝。
講到電影工作，偉仔就話暫時未收到心儀嘅劇本，但係佢就創作緊故事，希望揾班底開拍，不過就強調唔會揾嘉玲參演喇，因為佢話同太熟嘅人一齊拍戲，感覺好奇怪，演敵對角色嘅話，亦都無咩新鮮感，至於演出舞台劇，偉仔就耍手兼擰頭，佢話自己嘅性格唔太適合演舞台劇，總係感覺好唔自在。