學友上海巡迴乒乓阿姨黎夏蓮捧場 歌神大讚毅力自信學習不言休

早前喺巴黎奧運代表盧森堡出戰女乒個人賽嘅 倪夏蓮 ，以高齡61歲第6次參與奧運，加上佢極之開朗嘅個性，雖然32強不敵國家隊嘅 孫泳莎，但係驚人嘅球技同場邊同老公飲汽水一幕已經令大家留下極為深刻嘅印象。

月前第6次出戰奧運嘅倪夏蓮，個人故事引人入勝
上海近日舉辦多項大型活動，除咗有費達拿現身網球賽，另一單當然就係歌神張學友嘅《60＋巡迴演唱會》上海站喇，而11號舉行嘅演出，就連有「東方乒乓女王」之稱嘅倪夏蓮亦有到場欣賞，佢一入場仲興奮到不斷彈跳，少女心一絲未變。
呢日佢到上海欣賞學友嘅演唱會，再次成為焦點

同老公兼教練Tommy Danielsson一齊入場嘅佢，仲瞬即被學友認出，學友仲話多謝倪大姐令同輩嘅自己莫大鼓勵，之後又指唔應該稱呼佢為大姐，因為自己更年長兩歲，要改稱倪妹妹先啱咁話。

學友又話睇完今年奧運倪夏蓮嘅比賽同了解佢背後故事之後，笑言自己應該都有能力可以參加，之後就指自己係應該可以不言休繼續唱落去，之後再同全場觀眾一齊以掌聲感謝倪夏蓮嘅正面同努力。
拎住燈牌一直跟住唱，非常投入

完場之後，倪夏蓮仲指自己身為學友Fans，可以證明學友已經走向世界，因為首次入場欣賞學友演出嘅老公Tommy，都大讚表演令佢驚嘆咁話呀。