INFINITE主唱南優鉉來港開騷 透露患罕見癌症曝康復進度

韓國男團INFINITE主唱 南優鉉 日前訪台舉辦個人演唱會後即來港開騷，演唱會前佢出席記招見Fans同傳媒，時隔8個月再度訪港嘅佢，一出場就以廣東話自我介紹，仲用甜言蜜語冧Fans，搞到連翻譯姐姐都招架唔住。
韓國男團INFINITE主唱 南優鉉來港出席記者會。
當大會主持問南優鉉再來港有咩想食同有邊度想去時，估唔到佢嘅答案相當之冧：「我想去嘅地方就係各位INSPIRIT(INFINITE粉絲)嘅內心，我想吃的東西就是大家嘅愛。」見到偶像咁識做，Fans亦集體用韓文高呼「我愛你」回應。

之後南優鉉繼續全方位耍冧功，主動突破圍欄落台，邊唱歌邊同歌迷近距離互動，又同大家Selfie、握手、簽名、一齊整心心，一齊合唱，全場氣氛High爆。
南優鉉落台與fans近距離接觸。
其實南優鉉去年曾透露患上罕見癌症－胃腸道基質瘤，佢接受手術後逐漸康復﹐見到佢呢日咁有活力，令各位Fans都相當放心，佢亦開腔話身體無問題，而工作亦排得密密麻麻，年底忙於自己演出嘅音樂劇之外，INFINITE嘅新一輪巡演亦會展開。