吳君如入行40載獲頒焦點香港影人 入圍競金馬影后如打強心針

最近忙住宣傳《我談的那場戀愛》嘅 吳君如 ，日前同陳可辛飛往夏威夷，不過此行就並非旅行充電，而係出席「第44屆夏威夷國際電影節」。入行已40年嘅君如多年來拍攝逾150部作品，呢次佢更獲頒發「焦點香港影人」，由華籍當紅荷里活演員 Ronny Chieng 手上接過獎座。

君如由華裔棟篤笑演員Ronny Chieng(左一)手上接過獎座
此行佢亦為《我談的那場戀愛》落力推廣， 何妙祺 首次執導就入圍電影節「聚焦香港」單元。早前君如曾承諾得獎後會入鄉隨俗跳草裙舞慶賀，呢晚正式接受獎座後，一身夏威夷風情打扮嘅佢就走到泳池旁邊，手執沙鎚擺動身軀，即場跳草裙舞「找數」。
事後君如即跳草裙舞找數

君如喺台上講到得獎感受時話：「我非常幸運喺香港電影鼎盛時期開始我職業生涯。我由最初扮演小角色開始，每一個角色都盡力去演，希望喺觀眾心目中留低深刻印象。我喺角色創造自己個人風格，同編劇、導演共同創作，令我嘅角色、演出變得更有趣，然後更靚、更好。40年來，我拍過150部電影，我好榮幸成為焦點電影製片人；因為我嘅職業生涯係從焦點之外開始。我仍會繼續學習點樣成為更好嘅演員同製片人。」
從影已40年嘅君如話會繼續為香港電影努力

君如獲頒嘅「焦點香港」影人獎，旨在表揚佢一直以來對影壇嘅卓越貢獻同傑出成就，佢仲係繼王家衛同關錦鵬導演之後再獲呢個殊榮嘅香港電影人。
君如繼繼王家衛同關錦鵬後獲頒呢個獎

除咗領獎之外，君如一到埗就出席「夏威夷國際電影節聚焦香港」歡迎議式，席上同一眾同樣獲邀出席嘅友好好似 衛詩雅 區嘉雯  《破. 地獄》導演 陳茂賢 《武替道》嘅 梁冠堯 梁冠舜， 仲有喺荷里活發展的華籍演員Jimmy O. Yang、Ronny Chieng ，導演Charles Yu等難得聚頭，趁機放鬆一下，適逢晚上有煙花盛會，君如同Peter仲雙雙漫步海灘，享受難得浪漫。
君如又遇見Jimmy O. Yang同導演Charles Yu

完成呢次夏威夷之旅後，君如就要為《我談的那場戀愛》繼續忙碌，又要準備出戰下月底舉行嘅「金馬獎」角逐最佳女演員獎，期待為香港電影再次爭光。

佢同Peter又趁機偷閒，之後就要開始準備迎戰金馬獎