看我今天怎麼說｜黃修平新作倫敦影展世界首映 游學修苦練手語入圍逐金馬影帝

由 黃修平 監製兼執導 游學修 鍾雪瑩 吳祉昊 領銜主演嘅電影《看我今天怎麽說》，日前喺英國電影協會倫敦影展 舉行世界首映，黃修平率領團隊包括監製何康、監製廖婉虹、手語指導海鳥同胡歷恩、編劇千春親赴當地出席，又同當地觀眾交流，更分享背後選角故事，大讚入圍金馬競逐影帝嘅游學修開拍前苦練手語。

《看我今天怎麽說》團隊早前出席倫敦影展，同當地聾人交流
講述三位聾人青年成長故事嘅《看我今天怎麽說》入圍下月舉行嘅第61屆金馬獎三大獎，包括游學修同鍾雪瑩分別提名影帝、影后，以及最佳音效。而呢次出征倫敦影展舉辨世界首映現場全院滿座，令團隊非常振奮！

繼2021年嘅《狂舞派3》後，相隔3年再度推出新作嘅黃修平，對電影獲邀參與BFI倫敦影展同舉行世界首映非常榮幸，佢話：「可以將香港故事帶畀全世界，電影仲得到非常之受國際上認可，好高水準嘅BFI London Film Festival青睞，邀請我哋世界首映，係相當之榮幸。」
新片亦於影展舉辦全球首映同分享會

黃修平仲覺得能夠同倫敦嘅香港朋友重聚，令首映別具意義。佢仲提到現場觀眾對電影中一啲微細嘅聲音效果同無聲場面，引起觀眾深刻共鳴相當感動。
黃修平亦分享兩位主角游學修同吳祉昊，選角嘅背後故事：「一早我已經決定聾人角色一定要由聾人演出，最後經手語老師介紹揾到Marco(吳祉昊)，我覺得佢本身性格，形象，同埋佢對演戲嘅熱誠，縱使係素人都好適合做Alan呢個角色。」
導演指游學修電影開拍前用盡所有努力學習手語

至於選擇游學修飾演聾人子信，黃修平就話：「游學修作為健聽人，要演出聾人角色其實係好大挑戰，我對佢嘅才華非常有信心，加上佢嘅個人經歷、性格都同子信角色好吻合。開拍前我哋非常之嚴謹同唔留情咁請老師訓練游學修嘅手語。喺唔同情境下有唔同嘅手語表達，佢同聾人朋友，同屋企人之間嘅手語style都唔同，而佢好認真咁去做呢件事，最後出嚟嘅效果非常好，佢獲得金馬獎嘅最佳男主角提名，係對佢努力同才華嘅一個肯定，非常之恭喜佢。」
電影幕後功臣齊齊到訪倫敦，又一齊以手語展示戲名

導演仲感謝影展特別安排手語翻譯員，令聾人觀眾同團隊可以暢快喺映後分享會交流：「大會嘅安排非常細緻，手語翻譯員、聾人觀眾嘅位置安排同燈光控制，都令手語演繹清楚可見，非常細心同尊重在場嘅每一位，令我印象深刻。」
大會仲為首映觀眾安排手語傳繹

電影中手語演繹成為倫敦影展令人深刻難忘嘅一幕，導演又特別讚揚兩位手語指導海鳥同胡歷恩，喺首映禮上嘅同步傳譯：「海鳥用香港手語即時解說觀眾問題，胡歷恩則將手語內容翻譯成英文，呢場手語傳譯展示電影嘅創作核心訊息，將銀幕上嘅共融精神推廣到更廣泛嘅國際影展舞台，我認為意義重大。」