劉俊謙單槍匹馬赴韓宣傳《城寨》 應邀參與活動與朴敘俊阿莫帝同場

參與港、台唔同作品演出而大受歡迎嘅 劉俊謙 ，近日快閃首爾3日2夜，除咗應運動品牌邀請參加有趣嘅體能活動之外，仲單人匹馬走足5場，為星期三就喺當地上畫嘅《九龍城寨之圍城》宣傳。

劉俊謙日前到韓國為《城寨》宣傳
雖然呢次行色匆匆，但就夠晒充實，Terrance仲一早袋定幾句韓文傍身。今次單拖赴韓謝票嘅 「信一」，甫出現即大受當地觀眾歡迎，仲有Fans由香港遠道追到韓國捧場，非常熱情。仲喺電影分享會自爆拍攝《城寨》前，需演繹經典電影《教父》嘅兩段戲試鏡。
佢仲指試鏡時被導演要求以《教父》兩段戲測試

佢回憶試鏡情景話：「其實呢部電影製作認真，拍攝前導演仲需要我演繹《教父》中兩場戲，一段係阿爾柏仙奴喺婚禮上同一個女人嘅對話，另一段係佢他同兄弟分享關於家族嘅事，背好之後就去Casting，導演鄭保瑞不斷要求我用唔同演繹方法，雖然唔知到底係演什麼故事，好享受呢個過程，亦好感恩得到「信一」呢個角色。
阿謙為呢次宣傳學定韓文自我介紹

呢次首爾之行，阿謙仲同 朴敘俊 喺運動品牌活動碰面，他以有限韓語同對方打招呼，又大讚佢非常友善。活動中佢仲同《體能之巔：百人大挑戰》冠軍阿莫帝一齊運動，仲話好似自己體能都有所提升咁話。

仲同韓劇男神朴敘俊一齊現身品牌活動