陳健安邀好友拍攝MV 盼世界能有更多有趣嘅人

陳健安邀請咗熱愛舞獅嘅女歌手THAIMAY、飼養爬蟲類健身教練Gary、歌手兼廚師RegenC.、魔法師EKEE、拍攝意識流風格影片嘅Freeeboyzzzz 同 音樂創作嘅謝芊彤，六位好朋友拍攝其新歌《我違和但我不糾正》MV。當日Gary帶嚟身長1.8米嘅大蜥蜴到場，瞬即成為全場焦點，台前幕後都爭相要摸摸同合照。
安仔邀請嚟六大單位拍攝新歌MV。
安仔表示新歌係講一啲人喺生活上做自己覺得開心快樂嘅事，但身邊會有好多唔同嘅反對聲音。安仔指因為自己自帶「過濾器」，所以即使有遇過呢啲反對嘅聲音，佢都會充耳不聞：「可能我就係有呢個過濾器，根本就聽唔到反對聲音，所以我先至可以走到依家，無論做歌手或者20年前開始玩花式足球，可能就係因為我嘅性格，我會block咗嗰啲阻止我或者反對我嘅人和說話，我唔記得佢哋講過乜，但我依家過得好開心。」
健身教練Gary帶埋佢嘅寶貝1.8米嘅大蜥蜴到場。
對於今次請嚟拍攝MV嘅六個單位，安仔指佢哋每個人都做緊自己鍾意嘅事，但背後都經歷過被反對。好似楊雅文THAIMAY喺10年前瞞住家人拜師學舞獅，最初因為自己鍾意嘅男仔學舞獅而跟住去學，雖然追男仔失敗，但佢就愛上舞獅，即使畀人取笑手無縛雞之力，連家人都反對，但佢仍然堅持。
張惠雅RegenC與安仔。
提到好友張惠雅RegenC.，安仔指對方成個人生都好遺和：「原本唱歌跳舞，無端端喺長洲開餐廳做廚師，最近在葵涌做到會，又無端端一個人去西藏旅行。」RegenC.指全部都係佢嘅興趣，賺到錢就出歌繼續追夢，雖然生活艱難但過得開心滿足。
楊雅文 10年前瞞住家人拜師學舞獅。
另外幾個拍攝單位，安仔表示：「Gary係我嘅健身教練，佢8歲開始養爬蟲類，今日帶咗佢嘅寶貝Black Dragon嚟一齊拍攝。另一位係呢首歌嘅作曲人芊彤，佢好細個開始音樂創作，過程經歷唔少反對聲音，但一直堅持。仲有三個男仔組成嘅Freeeboyzzzz，佢哋喺網上拍一啲意識流嘅片，紀錄開心嘅事情。至於EKEE本身係電台DJ，之後去夾Band和做咗魔法師。」
Black Dragon成當日嘅焦點。
此外，安仔還展示身上最近火紅的日本動畫Chiikawa 其中角色Usagi 掛飾，佢又透露自己童年愛玩Barbie：「我細個鍾意幫Barbie著衫、玩著衫紙公仔，小學嗰陣好鍾造手作，但之後唔知點解無繼續，入行後又重拾呢個興趣。假如當時有人鼓勵我，可能今日係一個出色嘅手作家，如果多啲人得到支持，呢個世界會有更多有趣嘅人。」