黑色月光丨王浩信與楊茜堯再合作感高攀 林夏薇夥馬志威熱舞宣傳掀高潮

楊茜堯、林夏薇 同 馬志威 喺北京馬不停蹄宣傳台慶劇《黑色月光》，完成咗文娛城嘅活動，就會合 王浩信 繼續到影院宣傳，同粉絲近距離交流。呢劇係茜堯復出接拍首部劇集，粉絲都好奇有咩原因打動到佢接拍，茜堯話當初監製喺電話邀請佢時，話角色係好適合佢，當時抱住BB嘅佢聽完個故事就好鍾意，仲想好好再創一番事業。

Vincent加入茜堯薇薇同Edward，一齊宣傳《黑色月光》
繼劇集《名媛望族》之後，浩信同茜堯相隔12年再合作，仲回想當時茜堯演自己後母，所以一直覺得跟對方合作就有種高攀嘅感覺，今次能夠再合作，佢坦言超級期待。
原來佢上次同茜堯合作已經係《名媛望族》

馬志威今次係搞笑擔當，現場有觀眾要求佢騷腹肌，佢就因為推辭而要接受懲罰，被飲北京特色豆汁，身旁嘅茜堯同浩信都一齊飲。之後馬志威同薇薇被點名跳舞，睇得開心嘅茜堯同浩信都聞歌起舞。
馬志威試飲北京特色豆汁，睇佢面口就知飲唔慣喇

其實大家咁落力宣傳都係希望新劇創佳績，佢哋仲承諾如果收視達標仲會派福利，馬志威話到時茜堯會唱歌，但茜堯更正係由佢委派馬志威除衫唱歌跳舞，浩信話如果成績再好就一齊唱歌，最希望就係能夠開拍續集。
佢哋又即場接受跳舞挑戰

茜堯同薇薇合作，大家都睇好佢哋可以再爭視后，但兩位就好謙虛，薇薇同茜堯都話能夠成為競爭對手係榮幸，浩信就話先恭喜佢哋奪視后。