友人網上稱蕭亮被安葬於公墓 指鄰居聞到異味揭於家中離世

今年3月網上傳出蕭亮離世消息，起因係有網民於蕭亮嘅YouTube Channel中留言，指他已於3月上旬於多倫多家中逝世，不過當時一直未有相關人士能證實消息。直到6月，再有另一自稱係蕭亮TVB嘅前同事兼好友，再於其YouTube Channel中留言，詳細解答網民關於簫亮過世嘅問題。

蕭亮
該網名為「My golden years」嘅蕭亮好友，於留言中表示自己喺2024年1月收到自稱係警察嘅人來電，當時對方指一位名為盧永華嘅人死咗：「我問警員他何時去世及死因，他告訴我說是鄰居發現異味然後叫管理員開門才發現的，所以我相信他是在2023年尾去世的。」
自稱係蕭亮好友、該網名為「My golden years」嘅男子，喺網上透露蕭亮離世詳情。
該友人又指自己同蕭亮係多年嘅朋友，雖然雙方曾經失聯，但喺對方移民到溫哥華後大家就再次聯絡上。由於蕭亮居住嘅地方需要登記佢嘅直系親屬聯絡電話，但該友人指可能蕭亮喺加拿大無親人同朋友：「我可算是他唯一的朋友，所以便填上我的姓名及電話。他的死訊現只有我一人知道，相信應該更多關心他的人也知。」
「My golden years」於蕭亮嘅YouTube Channel中留言。
關於蕭亮嘅葬禮，該友人表示因為其遺體會轉去兇殺組調查，之後就會由佢嘅親人去認領，但如果一個月內無人認領嘅話，就會由政府處理，所以該友人指蕭亮唔只冇舉辦葬禮，而遺體亦係運送到公墓安葬。

雖然該友人提出不少細節，但關於蕭亮逝世一事，仍未獲其親友或第三方證實。