佘詩曼大露背現身慈善晚宴 睇劇本考慮會否接拍律師新劇

身穿大露背晚裝嘅佘詩曼聯同余安安、小肥等一眾嘉賓出席為病童籌款嘅慈善晚宴，出名係圈中孝順女嘅阿佘日前就陪同媽咪出席宴請朋友嘅聚會，佢話媽咪同朋友間會輪流請食飯，咁啱今次到媽咪請，自己又有時間咪一齊出席，不過阿佘講明係媽咪畀錢。

阿佘呢日一身露背晚裝同媽咪參加晚宴
有報道指阿佘將接拍鍾澍佳以律師為題材嘅新劇，嚟緊明年初接拍《新聞女王》電影版及劇集《新聞女王2》嘅阿佘，笑言可以講睇緊劇本，但若果要接拍就要11月開始，代表佢要連續9個月都不停拍攝，佢好擔心影響之後拍攝狀態，但阿佘直認如果好鍾意劇本的話，都會唔捨得放手。問到律師角色會否想挑戰？阿佘都話未演過律師，兼且有種為民請命及爭取公義感覺係很吸引。阿佘又話之前好驚背好長嘅對白，但經過《新聞女王》之後，就添加信心。

明年開拍《新聞女王2》嘅佢仲有其他新劇接洽

小肥近排陸陸續續推出早前喺演唱會獻唱嘅新歌，佢話仲會為每首歌拍攝MV，因為有MV先可以放上各大平台播放。小肥都話對歌曲MV拍攝有構思，但往往要考慮到一個問題就係錢，因為佢啲天馬行空諗法往往要用錢堆砌，所以都係交畀專業團隊負責。

小肥希望為自己推出嘅新歌拍攝MV