奶仔滑雪有天份考獲教練資格 冇時停乜都玩車牌一大籮

方紹聰 早年主持嘅《野外步出》系列，擺明就係將自己冇時停坐唔定嘅個性自肥喺節目發揮，既可以同唔同靚女嘉賓合作，又可以滿足自己周圍通處跑嘅慾望。近日奶仔又再有新興趣喇，去年開始學習滑雪嘅佢，短短時間之下考獲人生首個教練資格，仲話大家以後可以叫佢Milk Sir呀。

奶仔非常投入下終於獲得滑雪教練資格
其實奶仔年初已經貼出過自己滑雪嘅影片，見佢滑得非常平穩又放鬆，以為佢已經係老手，點知原來佢只係初接觸呢項運動嘅初哥，全情投入嘅佢經過朋友鼓勵下報考教練班，最近就不斷到廣州練習，雖然首次考試失敗，但係佢過連日不斷狂操之後，奶仔終於成功獲得首個教練祺格喇。
雖然接觸時間唔長，不過勝在以努力同熱情搭夠

奶仔同一班同學仔齊齊慶祝

除咗滑雪教練之外，奶仔仲先後考獲巴士同中型貨車駕駛執照，加加埋埋私家車、電單車、小巴、的士、巴士、貨車牌都有晒咁滯。而去年同 吳業坤 伍富橋 組隊參加毅行者嘅佢，似乎真係一刻都唔可以停落嚟，3月時又曾去到大馬參加賽艇比賽，1月初又跑畢全馬，唔知冇時停嘅佢，下次又打算搵咩再挑戰自己呢？

奶仔近年亦狂考唔同種類車牌

年前嘅《野外步出》系列佢同唔同女藝人挑戰唔同山野