米雪親自率團獅城演出 籌備聯絡邀請藝人一腳踢

米雪 最近率領一班資深藝人同粵劇名伶，到新加坡參與演出一場《百花齊放鑼敲響》，大受當地觀眾歡迎，反應熱烈座無虛席。今次演出係米雪同新加坡多媒體製作人王家翔聯合監製，而作為策劃人同組織者嘅佢，仲親自邀請各位藝人參與咁話。

米雪籌備之餘亦同尹光一齊參與演出
同圈中朋友關係一直非常深厚嘅佢，又話非常感恩老友一呼百應，呢次 尹光 呂珊 馮素波 蔡國慶 加上粵劇名伶 王志良 林穎施 鄭詠梅 等，於星洲演出多齣粵劇折子戲，佢自己亦大開金口娛賓。
近日被指太消瘦嘅呂珊、馮素波同鄭詠梅亦係演出陣容之一

雖然今次只係演出一場，不過就喺當地掀起搶飛潮，米雪就指新加坡觀衆非常喜歡香港藝人，對粵劇呢門傳統藝術更有非常深嘅情意結，亦好關心粵劇發展同傳承。因疫情影響今次演出足足遲咗幾年先開鑼，如今大家共同努力之下終於圓滿完成，令佢非常開心。佢仲透露之前曾喺檳城同夏雨見面，亦曾力邀對方參與，不過對方就以時間太緊迫為由婉拒，但承諾往後有機會定必參加。
馮素波早前同姊妹出遊，就係同米雪、呂珊、鄭詠梅等赴獅城

笑言已非首次擔任策劃人嘅米雪，笑言早已習慣身兼多職以唔同形式演出，活用自己行內多年人際脈絡同演出經驗籌備各種活動，自己亦非常享受其中。佢仲話稍後將會參演兩齣新劇，有時間仍會繼續組織藝人到各地為大家演出呀。