戰場上丨黎芷珊訪烏克蘭以色列紀錄無情戰火 體會當地居民隨時逃難情緒狀態

黎芷珊主持台慶節目《戰場上》呢日舉行記招，節目由11月4號起逢星期一至五晚10點半播出，呢次芷珊同攝製隊親身走訪烏克蘭同以色列，兩大飽受戰亂嘅地方，以第一身視角紀錄同展示喺無情戰火下發生嘅人同事。

黎芷珊為節目走訪戰火連天嘅烏克蘭同以色列
芷珊喺記招分享於當地拍攝嘅照片，司機教佢哋當有警報嗰陣，車喺公路行緊要點樣自保自救，芷珊又探訪一個家庭，收留來自唔同家庭被遺棄嘅孤兒，呢個家庭因打仗要到處避難，被逼搬去三、四個唔同嘅地方。
節目11月4號起首播

芷珊有感呢個節目同以前拍嘅好唔同，想自己有啲改變，所以佢自薦擔任主持，出發拍咗3星期，而芷珊前往當地前，監製要去做資料搜集，芷珊有一晚同監製傾電話，監製指烏克蘭首都基輔應係安全啲，點知幾個鐘後，芷珊睇新聞見到基輔有幾間兒童醫院被炸，當時監製有問佢係咪好驚，要唔要再考慮吓！
芷珊坦言初到當地徹夜難眠，更自備走佬袋預備隨時逃難，後嚟要習慣去體會當地居民嘅心情，嗰種感覺係好無奈，又要驚又要繼續生活做嘢。