李宗盛相隔10年再會西安歌迷 獻唱大熱經典歌掀起回憶殺

李宗盛今年4月展開內地巡迴演唱會，走過天津、杭州、南寧、成都、南京、武漢、澳門、太原、廣州等城市之後，第70場同71場唱到西安，相隔10年再同西安歌迷見面，少不免要送上連串經典好歌，大哥先後演唱多首為人作嫁嘅大熱歌曲，包括寫俾趙傳嘅《我是一隻小小鳥》，以及寫俾張信哲嘅《愛如潮水》，大哥唱起上嚟都別有一番風味，亦掀起一陣回憶殺。

李宗盛自己4月開始嘅內地巡迴去到西安演出
除咗為其他歌手創作嘅歌，大哥當然都有獻唱自己嘅大熱作品，尤其唱到《山丘》，大哥回憶起當初嘅創作動機，佢透露當時係2000年，自己生活過得並不如意：「那時先寫了《山丘》旋律，當時也不知要填什麼詞，直到2013年才把詞填上去，寫歌不能著急，十年磨一箭！」
呢場仲為西安歌迷獻唱之前場次未演出嘅歌曲

為咗西安嘅歌迷，大哥仲特登重新安排歌單，唱咗首之前喺其他城市都未唱過嘅《真心英雄》。
之後演唱會將轉往美加等地舉行

完咗內地巡演，大哥嚟緊仲有連串嘅巡演行程，包括新加坡、多倫多、紐約、拉斯維加斯等。