吳忻熹生日迎癌細胞指數急降 未來有連串大計傳遞正能量

今年8月公開乳癌復發嘅前港姐吳忻熹（前名：吳文忻）忻熹，日前接受電台節目訪問，分享抗癌歷程。忻熹癌細胞一度擴散至淋巴位置，但佢積極尋求治療方法，更一度放棄化療前往泰國接受細胞治療，而喺佢50歲生日就傳嚟身體內嘅癌細胞指數成功急降好消息！

吳忻熹日前接受電台節目訪問，分享抗癌歷程。

忻熹喺節目分享將前往泰國接受治療，係因為早前收到一位朋友來電，指佢嘅爸爸喺當地醫院治療末期血癌，問忻熹會唔會考慮呢個治療方法。忻熹喺了解後，認為呢個方法完全係佢嘅信念：「我一向都相信比較自然嘅療法，而呢個自然療法係好科學嘅，只不過香港仲未有，所以我立即轉咗治療，做咗呢個先。」

忻熹癌細胞一度擴散至淋巴位置，但佢積極尋求治療方法，更一度放棄化療前往泰國接受細胞治療。
唔少人好奇點解有膽量做出新嘗試，忻熹解釋：「人哋血癌末期都搞得掂，冇理由我呢啲較輕嘅搞唔到，因為乳癌係癌症之中最輕微，就算做完之後仲有癌症，我都可以繼續喺香港做化療。」忻熹接受細胞治療後感到身體情況比之前強壯唔少，免疫系統有所提升，兩位主持大讚佢精神奕奕，作為十月壽星嘅佢都有精神同向海嵐等朋友聚會。 忻熹憶述喺香港接受三次化療同一次免疫治療時嘅身體狀況，形容自己感覺到身體係冧得好嚴重，講嘢咳得好犀利，然後又周身骨痛：「好似變咗個阿婆，骨質疏鬆同肌肉流失得好嚴重。」 

吳忻熹亦感謝呢個病令佢反思人生，同時令佢擁有第二人生。

雖然化療期間令忻熹苦不堪言，但佢亦感謝呢個病令佢反思人生，同時令佢擁有第二人生，所以佢喺未來都有連串大計：「最初係想出一本書講抗癌，不過啱啱又諗到之前都有藝人患癌之後康復，我可以做主持訪問佢哋，做一個特輯，而家有十幾個名單。」忻熹初步構思舉行慈善音樂會，用音樂串連唔同故事，向大家傳遞正能量。