節目巡禮2025｜各式綜藝節目走遍全球 嘻笑輕鬆探視內心世界

早前介紹完劇集，跟住就為大家介紹 TVB 明年嘅一系列重點推介綜藝節目，「綜藝百變，千種體驗」，2025年將分別有《戰場上》、《與天地對話》、《江湖見》、《養生之旅》、《重地解鎖》、《我有我女程》、《弦動校園》、《唱到世界那邊端》、《沙灘少女BEACH GIRLS》、《酒鬼地圖》、《香港美味戰場》、《小將》、《一日打工限定》、《帶阿姐看世界》、《透視心靈的森美測驗》同埋《分手旅行團》等節目為大家帶來各地同人嘅唔同面貌。

《戰場上》、《與天地對話》仲有《江湖見》都喺日前節目巡禮現場播放宣傳片，《戰場上》節目主持黎芷珊一探當今世界戰火最激烈嘅兩個戰場—烏克蘭同以色列，走遍一個又一個遭受戰火洗禮嘅大城小鎮，悼念戰爭中無辜喪生嘅普通市民、同時用心聆聽倖存者嘅遭遇同與戰爭有關的故事。
芷珊走訪戰火連天嘅以色列同烏克蘭

宣傳片提出兩大問題「點解要殺戮」、「點解要打仗」，喺以色列同巴勒斯坦，無辜人民每日都可能面對突如其來嘅戰火，仲有自身或身邊親友被殺死或襲擊嘅危機；烏克蘭每日每人都有親友因戰爭或傷或死，每一日都有原本不應該發生嘅葬禮舉行。芷珊感觸話：「從未試過一個拍攝旅程，面對咁多死亡同摧毁，慶幸嘅係摧毁唔到嘅係人嘅意志同希望。」
了解當地平民面對戰火嘅恐懼同無奈

而一直受高度關注嘅《與天地對話》，宣傳片以遼闊天地美景打開序幕，旁白講到：「四位唔同背景嘅藝人，踏上旅途，為人生四大思考問題尋找答案」，姜皓文、林盛斌、蔡思貝同余文樂獨自走訪南也門、澳洲北領地、索科特拉島以及大堡礁，探討「身處逆境，應如何自處？」、「性格是否決定命運？」、「人生最可怕是什麼？」同埋「人生是為誰而活？」四大人生思考題。
面對浩瀚，大男人一樣有脆弱之時

入行後見盡風浪、遇過唔少抨擊嘅四位嘉賓，將喺鏡頭前赤裸剖白，仲不約而同喺呢次難得心靈之旅流下感觸眼淚，絕對係感性之選。
一度低調生活嘅余文樂亦參與節目

而有別傳統旅遊節目嘅《江湖見》，將由分別曾演過金庸武俠劇經典人物周伯通及游坦之、又喺劇集《西遊記》中飾演師兄弟嘅黎耀祥同麥長青主持，佢哋將走入著名武俠小說同經典文學作品中描述過嘅江湖世界。
祥哥同麥包師兄弟將拍檔上陣

仲會穿梭內地八大省份浙江、 江蘇、湖南、湖北、陝西、福建、貴州、雲南，遊歷接近20個城市，介紹當地獨特風土民情、歷史古蹟同美食文化，好似「華山論劍」中的華山等。為突顯壯麗湖光山色，以及大江南北別具色香味嘅美食，節目採用大量航拍、特意拍攝食物同製作過程，加上兩位主持「食指大動」，絕對賞心悅目又吸引。
佢哋會為大家仔細介紹各地美食

節目巡禮中，亦公開籌備中嘅另外13個綜藝節 目，其中四個節目更即場公開招募藝人參加，包括有《帶阿姐看世界》、《一日打工限定》、《透視心靈的森美測驗》同埋《分手旅行團》！
Liza姐鼓勵各地地膽帶路同遊

其中《帶阿姐看世界》係Liza姐汪明荃相隔17年再度參與旅遊節目拍攝，Liza姐仲揚言只有一個要求，就係邀請唔同地方嘅地膽藝人，帶佢以最貼地同平民化方式旅遊，絕對是膽量大挑戰。

至於郭柏妍就將同三位港姐師妹關楓馨、梁超怡以及范莎莎，喺全新節目《沙灘少女BEACH GIRLS》為大家提供香港各個沙灘好玩攻略，又會介紹沙灘實用資訊。四人出席節目巡禮為節目宣傳時，郭柏妍仲預告將大派福利，而梁超怡主動徵求泳衣同潛水衣贊助，范莎莎則預告節目中將有勁多水上活動。

幾位靚女將拍攝《沙灘少女BEACH GIRLS》