劉俊謙日本分享會宣傳《贖夢》 有意效發家輝學做導演

由 張家輝 執導兼主演、劉俊謙、陳法拉領銜主演嘅《贖夢》，近日於「光影浪潮：香港電影新動力」東京站宣傳，  劉俊謙亦出席映後分享會，首次同日本觀眾見面，互動分享拍攝感受。

劉俊謙喺東京為《贖夢》宣傳，仲係首次同日本影迷見面
呢次亦係阿謙首次喺大銀幕欣賞《贖夢》，飾演背負秘密精神科醫生嘅佢，同張家輝飾演嘅病人喺戲中共涉人性深淵。而日本影迷觀賞後反應熱烈又踴躍提問，令阿謙倍感親切，佢仲罕有透露自己嘅導演夢。
佢仲指當地影迷嘅熱情令自己非常驚喜

首次到日本參展嘅阿謙對影迷嘅熱情非常驚喜，佢先以日文打招呼，再回應觀眾提問，被問到於大銀幕觀賞《贖夢》感受時，佢亦坦言非常震撼：「我自己覺得係幾震撼，因為拍嘅時候，唔知道好多畫面喺一個大銀幕出現會有咩感覺，尤其係夢境同現實嘅穿插，夢境中恐怖又夢幻嘅畫面交錯，我覺得夢境反映緊內心某啲感受，好魔幻又好誇張，成個觀影感受非常強烈。」
佢又同大家分享拍攝感受

家輝早前喺英國Grimmfest影展奪得最佳導演獎，阿謙亦送上祝賀：「對家輝哥嚟講，呢個導演獎意義重大，佢演員成就已經好豐富，但係佢對自己作品獲得認同非常重視。今次冇機會當面恭喜，借呢度先向家輝哥講聲恭喜。」
阿謙同家輝喺片中分別扮演精神科醫生同病人

有日本影迷問到阿謙會否嘗試由演員身份轉任導演，原來佢早有計劃：「其實我最近都寫緊劇本，諗住如果之後有機會，做導演之餘加上自己創作故事，至於我創作咩內容，就暫時唔向大家透露喇。」阿謙又自揭一向喜歡日本電影，特別係是枝裕和名作《比海還深》，仲話希望有機會拍攝日本作品咁話。
見家輝演而優則導，阿謙亦指自己一樣有導演夢想

《贖夢》廣受海外影迷關注，出征東京之前，經已入圍包括意大利烏甸尼遠東電影節、韓國富川國際奇幻電影節、西班牙錫切斯國際奇幻電影節全景單元、馬來西亞國際電影節、德國奇幻電影節，英國曼徹斯特Grimmfest電影節，以及巴黎詭奇電影節競賽單元，認真犀利。