Liam Payne 驗屍報告出爐 墮樓前已昏迷恐非自行跳樓

英國天團One Direction成員Liam Payne，上個月16號驚傳喺阿根廷首都嘅酒店墜樓身亡，終年31歲。佢嘅驗屍報告日前出爐，證實佢死於多處外傷及內出血，不過最離奇嘅地方係，報告中指出Liam喺墮樓前，可能已經處於半昏迷或完全昏迷嘅狀態，即係話Liam好大機會並非自己跳樓。
One Direction成員Liam Payne嘅驗屍報告日前出爐。
Liam喺初步驗屍報告中被驗出體內有酒精、可卡因以及安眠藥，阿根廷警方透露佢死前吸食強烈迷幻藥，因此懷疑佢係因為產生幻覺，自己跳樓身亡，不過外媒報導，如果根據最終驗屍報告，佢係墮樓前已經昏迷或者半昏迷，幾乎可以證實佢並非自己跳樓身亡。
英國天團One Direction。
不過阿根廷檢方調查報告指出，Liam墮樓事件並冇他人干預嘅明顯跡象，因此傾向認定佢係失足墮樓，即管Liam墮樓嘅真相依然撲朔迷離，不過檢方就針對Liam墮樓事件起訴咗三人，包括當時陪同Liam嘅友人，起訴原因係「涉嫌提供藥物」以及「因遺棄導致他人死亡」。另外仲有一位酒店員工以及身份未公開人士，亦因為涉嫌提供藥物被起訴。
報告中指出Liam喺墮樓前，可能已經處於半昏迷或完全昏迷嘅狀態。