得寵先生｜人寵共融齊入場睇新戲 Amy旦哥新作成狗界巨星

香港越來越多人視養狗仔貓仔為屋企嘅小朋友，而由 鄭丹瑞 同 盧慧敏 主演嘅《得寵先生》，星期六就同 香港愛護動物協會 合作，舉行兩場「狗狗友善慈善放映會」，逾百位觀眾帶同愛犬一齊入場睇戲，愛協會長 傅明憲 更帶同三隻愛犬撐場。主演旦哥、Amy仲有狗演員Little嘅主人Suki亦到戲院謝票同分享。

以狗狗為題嘅新片舉行慈善場，逾百毛孩同主人一齊睇戲
近年香港電影業情況嚴峻，旦哥呢日分享時亦一度哽咽：「香港拍電影已經好難，仲要揀個咁難嘅題材。但正正就係難，香港電影越難越唔忿氣，先至會有大大小小嘅電影產生。」之後佢又話：「最感動係『人寵共融』，我嘅電影可以做到，大家帶住心愛嘅毛孩，好enjoy咁睇咗107分鐘，多謝大家！」有份演出嘅狗演員Little早前因病去世，呢日現身嘅主人Suki，就指喺電影同Little再見面非常開心，仲感謝拍攝期間團隊對Little嘅照顧同愛護。
主演嘅旦哥、Amy一齊分享拍攝感受

而Amy受訪時就話：「我一入戲院見到人狗同場嘅畫面已經眼濕濕，因為拍呢部電影最大嘅訊息係平等對待生命，所以見到大家一齊坐、一齊睇戲，真係將毛孩變成家人，我好感動！」
Amy呢日大受狗狗觀眾歡迎，仲任錫唔嬲

早前講到喊嘅旦哥亦都話：「狗同小朋友係最難拍，導演連跨兩個難關，我有幸同佢哋一齊走過難關，完成呢件事。然後見到製成品，有毛孩有主人一齊睇、一齊拍手掌，同喜同悲，係我最大最大滿足感。」散場後唔少主人都帶埋狗狗同Amy合照留念，Amy不斷同大家合照，狗狗對佢呢個靚女亦非常熱情，對佢狂舔狂錫，令佢興奮高呼幸福滿瀉。
佢仲爭住同唔同可愛狗仔合照

於片中飾演一名獨居長者「佳叔」嘅旦哥又話：「有一句對白令我特別心痛『連人我都唔要做朋友，做乜同狗做朋友？』一個老人家去到咁蒼涼。所以我哋要留意身邊嘅老人家，打個電話去關心佢！」
旦哥於片中扮演一名獨居長者

Amy亦指因為電影先接觸關於獨居長者嘅問題：「香港人無論咩年紀，都好似缺少咗表達自己嘅習慣，然後就有誤解。《得寵先生》除咗係一部講流浪動物嘅電影之外，仲係講每一段關係，都應該多啲溝通、了解同包容。」