黃德斌戲稱睇葉童作品長大 大會澄清無出售入後台VIP票

葉童、黃德斌同楊永德呢日以舞台劇造型現身劇院，為嚟緊公演嘅舞台劇綵排，佢哋仲即場排練咗一段戲畀傳媒影相，雖然現場閃光燈不絕，但完全影響唔到葉童同德斌嘅發揮。

葉童、黃德斌同楊永德合作嘅舞台劇好快就會公演
現場睇兩位嘅演出就相當完美，不過葉童話其實劇中有好多對白都好繞口；而德斌就指佢哋嘅對白好日常，相信唔少觀眾都會講過，但就因為好日常，加上劇中會不斷重複，令德斌有時都有啲混亂，唔記得自己有冇講喇。
經驗豐富嘅葉童都話今次劇目對白繞口

劇中德斌同葉童飾演一對醫生夫婦，雖然兩人係第一次合作，但佢哋喺現場對戲時就顯得相當有默契，德斌仲搞笑咁話自己細細過睇對方嘅演出，到而家可以一齊合作令佢好開心呀。葉童聽到德斌咁講，就即刻以長輩口吻同對方講：「咁你聽話啦，我同你講啲乜嘢你要記住啦，係咪呀，乖喇。」提到葉童之前喺訪問中講過，對住德斌時自己會心心眼，葉童就話自己對住楊永德時都會心心眼，又指因為呢個劇由佢3人串連起個故事，所以大家嘅關係越密切，對演出會更有幫助。
舞台劇反映熱烈，網上就傳出有門票＋入後台影合照嘅package，呢日葉童就澄清返大會無安排呢個環節，提醒劇迷唔好受騙。

主辦單位特別澄清，指未有售賣所謂嘅後台合照門票