王菀之入行廿周年2月再踏紅館 破格唔換衫揀歌單頭都痕

今年入行20周年嘅 王菀之 ，近來除咗參演唔同電影之外，今日終於宣佈明年2月將再踏上紅館，舉行《合體 – 王菀之演唱會2025》，門票下星期三就供優先訂購，12月2號公開發售。 

Ivana話今次入行20年嘅紀念騷，主題合體係20年來創作路上嘅合體，亦係表演者同觀眾合體：「諗呢個名我會諗到好多合體，機械人合體啦，自我世界嘅合體。一個人奮鬥路上，第一件事就係要同自己嘅內在小孩合體，再同身邊嘅人合體，再同世界合體。由小的力量變大力量！ 一個同理心都係合體，20年來創作路上，唔少得歌迷支持，我可以開一個演唱會唱嘅歌全部由自己作曲，好幸福，都係因為有大家嘅支持。 舞台上嘅表演者冇觀眾，都形成唔到一個成功演出，所以今次邀請大家入場，再一次嚟同我合體，成就呢個20年嘅紀念日。」
Ivana明年2月將再開紅館個唱，紀念出道廿周年

早前佢拍攝演唱會海報，亦決定唔喺影樓拍攝，反而取景香港街頭角落，呈現開心帶笑嘅Ivana，佢話：「靈感嚟自我最近愛上攝影，鐘意咗影黑白相，20年來我都試過好多唔同造形、唔同角色呈現喺觀眾面前，有唱歌嘅我、電影嘅我、舞台劇嘅我，或者卡通配音嘅我。全部合體其實就係一個簡簡單單，同大家一樣生活喺同一個城市入面嘅王菀之，同各dreamer 一齊努力奮鬥。」
今次海報選擇於香港街頭拍攝

Ivana今次演唱會將有非常多突破：「通常演唱會都會準備最少6至8套衫，但係我好想專注送好多歌同大家分享，咁珍貴嘅兩個幾鐘，我唔想有一刻唔同大家一齊，所以今次想突破唔換衫！不如等歌迷揀啦，寧願我唱多幾首歌定係想我去換衫？哈哈。」
Ivana話會考慮全場唔換衫，用盡時間為歌迷唱歌

不過下決定之前，Ivana首要就係同團隊決定歌單喇：「原來我不經不覺創作咗200幾首歌。好多歌都好想唱唔想放棄。所以開左10次會都未揀到歌，依家一共有50幾首大家都唔想放棄。音樂總監就問係咪呢個不可抗力之下， 我哋提早六點就要開場呢？」