電影泉攻略丨黃子華為新戲親自上陣揸靈車 投訴戲中出現遺照冇利是收丨EP129

王鎮泉 Jeoffrey 每星期為觀眾提供最熱辣電影資訊，中外猛片專訪花絮上映時間全部集齊，「電影泉攻略」個個星期陪你睇新戲。

導演陳茂賢呢日同黃子華 上到嚟《電影泉攻略》。
由兩大笑匠黃子華同許冠文主演嘅新戲《破。地獄》票房勢如破竹，子華神同導演陳茂賢繼續分享拍攝點滴。電影以香港殯葬業為主題，當中涉及好多專業範疇，導演話開拍前用咗幾個月時間走訪生死tour，由醫院接大體，到舉行葬禮成個過程鉅細靡遺，子華仲透露自己連棺材車都揸過。

子華表示喺戲中要親自揸靈車。

另外由於劇情需要女主角衛詩雅親自上陣做破地獄儀式，但事實上呢個傳統道教儀式係傳男不傳女，所以開拍前為咗搵喃嘸師傅教Michelle破地獄，都費咗一番功夫。
戲中衛詩雅要親自上陣做破地獄儀式。
導演話雖然新戲題材敏感，但拍攝過程劇組反而百無禁忌，子華仲搞笑話自己成世人最想就係撞鬼，但到依家幾十歲人都未曾試過瀨嘢。至於圈內不成文規定，拍攝死亡戲份有利是收，子華就投訴戲中出現自己嘅遺照，但就冇收到劇組嘅利是，不過子華就澄清話自己喺戲中冇死到，大家唔駛擔心，至於點解冇死到都會出現遺照，大家就要親自入戲院搵答案啦！
子華投訴戲中出現自己嘅遺照，但就冇收到劇組嘅利是。
呢個星期嘅新片有名導演列尼史葛延續古羅馬經典嘅神作《帝國驕雄2》，盧修斯(保羅麥斯卡飾)童年時親眼目擊受萬人景仰嘅英雄麥師武死於舅父之手，多年後已長大成人嘅佢，喺暴帝嘅鐵腕統治下，被迫進入競技場為生存而戰。心中充滿怒火嘅盧修斯，眼見羅馬帝國未來岌岌可危，決心討回本來屬於佢嘅權力同榮譽，還羅馬人民一個輝煌嘅羅馬。

呢個星期嘅票房戰況，直至11月12號中午，第三位《Red One拯救隊》、第二位《焚城》、第一位《破。地獄》。