萬人迷Lisa襲港台上試食菠蘿包 親切可愛全場與Fans互動

韓國超級女子天團 BLACKPINK 泰籍成員Lisa，繼日前喺高雄舉行見面會之後，於香港亞洲博覽館舉行嘅香港站亦圓滿結束。香港係Lisa亞洲粉絲見面會嘅壓軸尾站，吸引萬多名來自唔同地方嘅粉絲入場。

Lisa以一身全黑打扮現身香港見面會
Lisa嘅見面會準時8點半揭開序幕，著上一身黑色性感舞衣，紥住長長馬尾嘅Lisa，先以人氣歌曲《LALISA》開場，瞬間炒熱全場氣氛！入行後首次以個人身份喺香港舉行粉絲見面會嘅佢，表示對歌迷嘅熱情支持感到十分幸福，又會以100%回饋歌迷，然後不時做出「嘟咀」、「單眼」等可愛表情，氹得台下粉絲非常開心。
露腿又露腿嘅佢不時同台下歌迷互動

之後嘅遊戲環節，Lisa喺台上品嚐香港地道美食菠蘿包，慢慢用餐刀切開，仲大叫「好味道」。大會亦特別準備唔少Lisa同粉絲互動嘅機會，先係鼓勵粉絲以特別裝扮到場，最突出裝扮者獲邀上台比賽，最後以一身LILIES盆栽扮相嘅泰國粉絲，鬼馬有趣打扮獲得全場最多掌聲，最後可以同Lisa合照同得到親筆簽名專輯。Lisa之後又帶住預備好嘅T恤走到台前，並拋到台下，令場面一度哄動。
不過日前嘅高雄站就有意見指見面會時間太短

Lisai之後再次同dancers現身舞台，演繹《New Woman》大跳椅子舞，繼而唱出《Moonlit Floor》同《Money》等快歌，台下歌迷亦不時跟隨歌曲擺動身體，又揮動手上粉紅心心應援棒。及後Lisa同全場粉絲大合照，而粉絲就齊心舉起手幅回應，希望令Lisa留下美好回憶，令佢非常感動。之後台上大銀幕放映Lisa嘅跳舞片段，即場Lilies Dance向大家挑機，被攝入鏡頭嘅粉絲必須跟隨Lilies Dance舞動，令全場氣氛再度升溫。

香港站係今次巡迴見面會嘅最後一站