汪明荃演唱會紅館揭序幕 林家謙陳慧琳任首場嘉賓

一連兩場《阿姐•汪明荃演唱會2024》首場星期六晚展開，陳百祥、黃杏秀、樂易玲、周慧敏、周美鳳、王浩信、梁思浩、關寳慧、黃建東、陸浩明同鍾柔美等都有捧場，陳慧琳 同 林家謙則擔任表演嘉賓。

演唱會以各種顏色珠寶劃分出唔同一部分，寓意汪阿姐係演藝圈瑰寶，阿姐先以金色造型獻唱《閃爍登場》同《迷人Pink Lady》為演唱會揭開序幕，之後問到觀眾可有留意演唱會標誌狼玄機：「唔理係Diva又好，阿姐又好，對我嚟講都只係一個稱呼嚟嘅啫，因為我一直都只係做返我自己 - 汪明荃，Liza！我就係要將最好嘅嘢送俾每一位觀眾，所以今晚希望大家都可以好開心咁去欣賞每一首歌，每一幕演出！」

汪明荃嘅紅館演唱會星期六晚起舉行
汪阿姐唱畢《天虹》後又話：「其實喺我嘅歌曲之中，電視劇主題曲佔咗好重要嘅位置，今晚當然會有好多首經典嘅主題曲送俾大家啦。」之後即為大家獻唱《金絲雀》。

換上一身寶石紅嘅紅姐，再現身就一口氣演出《銀河》、《華麗轉身》同《傾城之戀》，之後話：「今次演唱會我花咗好多心思，仲請人寫咗新歌做主題曲！我一向都愛才，好鍾意同啲有才華嘅人合作，一來作品水準有保證，二來又可以喺佢哋身上偷吓師，學吓嘢，所以今次我就請咗Wyman黃偉文幫我寫歌詞，同埋一位已經出咗名好耐嘅音樂才子寫呢首新歌，佢就係《Make my day》嘅作曲人，我今日嘅嘉賓 - 林家謙Terence，大家俾多啲掌聲佢！」

Liza姐今次演唱會造型非常華麗

家謙上台後，阿姐繼續話：「今次開演唱會想同新人合作，我問咗好多人而家邊個作曲最Hit？佢哋個個都推薦你，所以我就認識咗林家謙。」而家謙則笑問「佢哋係咪整蠱妳？」汪阿姐答到：「唔係，佢哋唔係整蠱，你寫嗰首歌係一首好歌。」

林家謙為阿姐作曲之餘亦擔任嘉賓
家謙又提到自己作曲受到顧嘉煇唔少影響：「佢寫嘅旋律同埋和弦，用埋一齊個效果係好高級同好優雅，大家未必可以即刻聽得出，但係好順耳，佢好多家傳戶曉嘅歌，大家都可以跟住唱，入邊有好多Details，當你去演奏呢啲歌嘅時候，會發覺佢哋真係好深，呢啲係非常高級亦都係我最欣賞嘅地方，所以今晚特登揀咗一首煇哥寫嘅歌同妳合唱。」此時現場就響起《用愛將心偷》前奏。合唱完畢後家謙更為大家獻唱《迷人Pink Lady》。

換上珍珠色配珍珠首飾嘅汪阿姐之後再度出現，先後唱出《家變》、《四季情》，又向創作兩首歌曲嘅黃霑懷緬道：「今年霑叔已經離開我哋二十年，但係睇返佢寫嘅歌詞，仍然覺得好有哲理。霑叔永遠都係香港嘅文化標誌代表，亦都係每一代香港人嘅共同回憶。」之後繼續為觀眾唱出《輪流轉》同《問我》。
同阿姐一向恩愛嘅家英哥之後出場，他先以一段棟篤笑公開佢哋嘅相處之道，然後仲唱出首本名曲《Only You》。

家英哥亦上陣為大家表演楝鳳笑同獻唱

第四部份以翡翠為主題，汪阿姐換上一套碧綠色服裝演出，大唱以宋詞為歌詞嘅Medley，之後又分別演唱《楊門女將》、《春花萬里香》同《採茶山歌》Medley，緊接《像白雲像清風》，然後再介紹第二位嘉實陳慧琳出場。

阿姐嘅服裝以寶石嘅顏色為主題
阿姐話：「我同Kelly只係合作過一次，錄過一隻歌，係18年前嘅事。」Kelly說：「呢首歌叫《自由女神》，講嘅係單身，18年前我同阿姐都係單身。」之後她就合唱《自由女神》，唱畢後Kelly話：「妳知唔知當日我哋合唱呢首歌嗰陣，妳就係我而家呢個年紀， 阿姐先至係凍齢始祖。阿姐真係好Fit、又靚，永遠都走前人一步，其實我同阿姐都有10幾年冇見，上兩星期我去咗studio同阿姐綵排，阿姐一見到我就話我肥咗，我當時心諗，阿姐唔係個個人都好似你喺呢50幾年，每一日都係喺最巔峰嘅狀態，我都有失手嘅時候。」

Kelly多年前曾同阿姐合唱，今次綵排仲再見識阿姐嘅認真
第五部份主題係鑽石，阿姐頭戴皇冠閃爆登場，唱出《京華春夢》、《郎歸晚》、《千王群英會》同《勇敢的中國人》，最後以《萬水千山總是情》結尾。

喺觀眾一片Encore呼聲下，阿姐而以中性西裝造型現身，先送上一曲《熱咖啡》，之後伴隨着《美麗娛樂世界》，大螢幕播放阿姐過往拍攝劇集嘅不同造型照，最後以一首《Make my day》為首晚演唱會畫上圓美句號。貼心嘅阿姐完場後，仲特意同紅館外等候嘅歌迷打招呼先離場。

Encore環節阿姐換上一身西裝演出