尋夢琴澳丨林夏薇甩暗黑角色望減輕觀眾恐懼 譚俊彥談胡定欣脫單：終於講得

雲集視帝視后級人馬嘅電視電影《尋夢琴澳》將於11月30日晚隆重首播！陳展鵬、譚俊彥（Shaun）、林夏薇及張曦雯呢日出席記招，繼《逆天奇案》後，薇薇同展鵬又有機會再續情緣，今次喺《尋夢琴澳》化身歡喜冤家，二人更合唱插曲。

《尋夢琴澳》11月30號首播
展鵬讚呢次拍電視電影雖然得個幾鐘，不過大家嘅角色關係都能夠連埋一齊，完全估唔到後面嘅情節，而薇薇好開心終於宣傳一個正能量嘅角色，皆因薇薇喺台慶劇《黑色月光》暗黑角色演得投入，令人不寒而慄，薇薇笑言近排啲人見到佢都話好驚，希望藉此減低觀眾對佢嘅恐懼。
薇薇話希望大家抹走佢之前嘅暗黑演出睇新作

Shaun與張曦雯亦再度合作，今次飾演上司下屬，而Shaun喺《尋夢琴澳》嘅真命天女就係胡定欣，佢同定欣飾演兩公婆，Shaun笑言跟定欣有好多床上演嘅戲，講到定欣脫單，Shaun笑笑口話終於講得，又話等定欣親自講，並送上祝福，透露拍緊《尋夢琴澳》時，正係定欣生日，Shaun就話：「咁大家都知啦！」

一早知定欣蜜運嘅Shaun話終於可以鬆一口氣喇