星光路上丨黎耀祥認社恐成日口噏噏 因劉青雲報讀演戲夜校獲添哥賞識

視帝黎耀祥（祥仔）飾演《巾幗梟雄》系列嘅經典角色，令觀眾印象深刻，祥仔接受TVB娛樂新聞台節目《星光路上》訪問，與主播潘盈慧蜴談入行經過，坦言一開始冇特別喜歡做戲，更指自己有啲社恐，其實好怕人多，但冥冥中自有安排，祥仔有感係上天畀咗天份，揀咗佢投身呢個行。

黎耀祥雖然貴為視帝，不過呢日就指自己係社恐I人
祥仔回想中學時期為咗加分，參與戲劇舍演出，當時未知自己興趣，只係想攞分，祥仔指本身有少少社恐，有時自言自語，幻想同人哋對話，檢討咁講唔係太好，成日喺度口噏噏。
早年加入TVB任文職嘅佢，亦難明點解會報考夜校學戲

後嚟祥仔中學畢業做過TVB文職，負責做廣告及節目編排部嘅嘢，足足做咗兩年，最記得「8640」呢個廣告數字，電視當年唔播足24小時，唔可以收8640秒嘅廣告，祥仔至今仍然好記得！祥仔笑指喺熟人面前特別玩得，成日喺公司模仿經典劇情場口，當係一個遊戲咁玩！

祥仔其後睇TVB周刊見到有一個夜校課程返三個月學演戲，當年係劉青雲賣廣告，祥仔被同事鼓勵試吓，又意外地獲取錄，祥仔上足8堂演技堂，上最後一堂係李添勝排戲考試，佢嘅題目係《新紮師兄》梁朝偉同張曼玉嘅一個場口，獲添哥讚呢組做得到，最終只有佢同拍檔有機會入TVB訓練班。
短短8堂啟蒙課程之後，佢係兩位獲邀正式入讀藝訓班嘅學員之一

祥仔覺得做人要對生活敏感、對周圍嘅嘢敏感，好多時就會得到提示，有機會向住某一個方向去做、去努力，可能會更加啱，當然路上未必咁順暢，亦必須要堅持!