郭富城將返內地拍戲演追債鬼 再做馬主親赴紐西蘭挑選愛駒

天王郭富城即將展開巡迴演唱會，呢排忙住準備個唱，呢日抽空出席代言活動，城城透露今年聖誕前後，要赴美國同台北等地演出，嚟緊台北演唱會更會舉家撐場，更預告個唱以全新造型亮相，帶畀觀眾新鮮感。

郭富城透露新戲將飾演追債鬼。
城城完成台北演唱會之後，就要趕返內地拍戲，今次佢挑戰飾演追債鬼角色，講到會唔會拍《九龍城寨之龍頭》，城城透露仍未收到劇本，除咗工作之外，城城閒時鍾意睇吓賽馬，坐擁三隻馬匹，最新嗰隻更係城城親自挑選！

城城再度榮升馬主，早前去紐西蘭挑選心水馬匹，指自己望到嗰隻馬覺得幾靚仔，仲話本來鍾意一匹馬想競投，但係有感嗰匹兩歲馬叫價700萬港元太貴，城城覺得要喺合理嘅價錢去投資，亦希望考吓自己眼光。