周杰倫大巨蛋演唱會high跳《三天三夜》 張惠妹再遭附近居民抗議引起地震

周杰倫 喺台北大巨蛋嘅四場演唱會日前圓滿落幕，尾場觀眾除咗欣賞到天團五月天擔任嘉賓，仲有幸聽到觀眾席上嘅天后張惠妹開金口獻唱，而且仲帶動全場3.8萬觀眾跳唱小巨蛋禁曲《三天三夜》，氣氛high爆，不過就估唔到再度引來附近居民投訴。

周杰倫嘅台北大巨蛋演唱會完滿結束

尾場仲有五月天擔任表演嘉賓
據台灣媒體報導，有里長接獲大巨蛋附近居民投訴，指周杰倫演唱會尾場舉行時，屋企感受到輕微震動，擔心日後情況會越來越嚴重，希望台北市政府可以正視事件，而台北市政府就回應指暫時未有收到相關投訴，會再了解事件。
座上客張惠妹亦有開口獻唱

阿妹2015年喺小巨蛋開騷，全場1萬歌迷齊齊跳唱high爆歌曲《三天三夜》，但係就引起附近嘅居民抗議，話感受到如5級地震嘅震動，當時嘅台北政府因此對阿妹罰款10萬台幣，更規定小巨蛋觀眾席嚴禁跳動，事後仲被外界戲稱為「阿妹條款」，而阿妹亦因為事件長達7年未再喺小巨蛋開騷。直到2022年阿妹先重返小巨蛋 ，仲搞笑自嘲話因為一首歌被小巨蛋禁足7年。
當年因為小巨蛋附近居民投訴，相關單位最後制定「阿妹條款」禁上觀眾喺席上跳舞

而日前台北市長蔣萬安面對議員質詢時，就曾經明確表示大巨蛋曾經結構技師認證，安全無虞，所以唔會有小巨蛋嘅震動問題，「阿妹條款」亦唔適用於大巨蛋，《三天三夜》喺大巨蛋可以唱亦可以跳。而阿妹將於今個月21號起喺大巨蛋開跨年騷，《三天三夜》想當然係必唱歌曲之一，到時就可以睇下大巨蛋係咪真係可以通過阿妹同歌迷嘅震動測試啦！

而21號就會喺大巨蛋開騷嘅阿妹，今次再接投訴唔知會唔會影響到時演出呢？