陳山聰入行30年首開音樂會 與李施嬅合唱有火花

陳山聰 今年入行30周年，當年以歌手身份出道嘅佢，而家已經搖身一變成為視帝，雖然山聰而家主力拍劇，但其實佢一直都無忘記初心，呢日佢更喺廣州舉行首個個人音樂會，好兄弟馬德鐘、梁競徽、金剛同埋陳敏之等都有專程嚟捧場。

入行30年嘅陳山聰終於一嘗開個人演唱會滋味
咁難得開show，山聰當然有唱佢嘅代表作《ABCD》，雖然山聰嘅歌手生涯好短暫，但係佢都有好留意其他歌手嘅歌曲，呢晚佢就揀咗多首心水經典作品送俾大家，好似黎明嘅《夏日傾情》、哥哥張國榮嘅《追》、林峯嘅《愛在記憶中找你》、陳奕迅嘅《Shall We Talk》同埋Beyond嘅《喜歡妳》。
呢日大班好友都有到廣州捧場

憑《今宵大廈2》奪得視帝嘅山聰，呢部作品對佢嚟講，當然係意義重大啦，而呢晚佢更揾嚟拍檔李施樺做嘉賓，兩人一齊合唱《今宵多珍重》，依然係好有火花呀，施嬅仲大展琴技，自彈自唱。講到全晚最感人嘅一part，當然係山聰談及同亡父昔日相處嘅點滴，講講下佢更忍唔住落淚添。呢晚山聰嘅囝囝雖然未有到場，但Jaco仔就送咗一份好窩心嘅禮物比爸爸，山聰講起嗰條寫滿Jaco筆跡嘅打氣毛巾時，佢都甜到入心呀。

施嬅同山聰合唱之餘，亦個人自彈自唱演出