瓊瑤火化殮葬陽明山花海 林心如親送別趙薇花圈致哀

作品紅遍華人社會嘅台灣知名言情小說家 瓊瑤 12月4號輕生離世，享年86歲。事隔一星期，家屬遵照遺願低調舉行家祭喪禮，未有舉行公祭，喪禮以瓊瑤本名陳喆設靈，中央擺放佢面帶微笑身穿紅衣嘅遺照，四周以白花點綴亦有蝴蝶裝飾。

一代言情小說作家瓊瑤永別塵世
當年因為先後參演《還珠格格》系列同《情深深雨濛濛》等作品而爆紅嘅 林心如 ，清晨一早就抵達靈堂向恩師致哀送別。而同樣因為「小燕子」 而演藝事業非常順利嘅 趙薇 亦隔海送上花圈道別。唔少曾與瓊瑤合作過嘅藝人，分別亦致送花圈告別。
林心如清晨約6點就抵達靈堂

早上8時許，瓊瑤獨子陳中維由太太同兩位女兒陪同，緊隨白色靈柩後，喺保安護送下由靈堂轉移往火葬場。完成火化儀式後，家屬隨即帶同骨灰前往陽明山舉行花葬儀式，過往曾參演唔少瓊瑤作品嘅 俞小凡 同獻唱過多首瓊瑤劇集歌曲嘅 李翊君 亦一同送別。
親屬緊隨瓊瑤嘅白色靈柩前往火葬場

瓊瑤獨子陳中維親手將母親骨灰撒入花葬場地，之後灑上花瓣同以瓦片覆蓋，為一代才女嘅最後一程畫上句號。
瓊瑤獨子陳中維將骨灰撒到花葬場地

林心如離開時只向現場大批傳媒點頭致意未有發言，而日前演出淚灑舞台嘅 古巨基 雖然未能出席送別，但係就指將茹素七日紀念恩師。

心如向有知遇之恩嘅瓊瑤最後道別