毒狗狂徒現林村放誘餌 謝嘉怡兩愛犬不幸中毒身亡

自參選港姐後定居香港嘅 謝嘉怡 ，數年來身邊一直有幾隻毛孩陪伴展開新生活，Lisa出外遊玩探索時，不時都會帶同愛犬一齊面對新事物，探索香港唔同角落，早已視毛孩如家人。

Lisa定居香港後飼養三隻愛犬Peachy、Summer同Leo
Lisa指星期日如常帶同3隻愛犬遠足，經過大埔林村社山村一條山徑，豈料有毒狗狂徒於現場放置混有毒藥嘅肉類誘餌，Lisa仲指誘餌包括整隻燒雞、香腸同其他動物一定鍾意嘅肉類，仲擺好喺盤中等待獵物，認為早有預謀。
星期日佢同愛犬同大埔遠足，不幸遇上有人以毒餌設陷阱

當佢發現其中兩隻愛犬曾進食後，佢哋已經有昏倒同抽搐症狀。其中唐狗Peachy送抵獸醫診所前不治，臘腸犬Summer亦不幸救治無效。
結果Peachy同Summer不幸身亡

Lisa引述獸醫指，誘餌當中包含神經毒素，快速就會攻擊曾進食犬隻嘅腦部，難以處理。面對摯愛離世嘅Lisa事後非常困惑同崩潰，四口出門只得Lisa同斑點狗Leo平安歸家，令佢心如刀割，亦不禁質問點解要毒殺動物。
Lisa居港後出行都會帶同愛犬

Lisa直言已對人性失去信心，不過依然感激路上遇到嘅有人幫佢截車，仲有車站以牛奶試圖協助狗狗嘅途人，同唔想載狗依然首肯急送佢哋去醫院，甚至分文未收嘅的士司機，與及已盡最大努力拯救嘅獸醫，令Lisa依然相信人間有愛。

事件令佢大為崩潰，仲直指對人性已失去信心
Lisa指一覺醒來後，準備為無辜枉死嘅愛犬挺身而出，佢質疑合法購買毒藥嘅規定，又反思令愛犬更安全嘅方法。甚至認為施毒手者隨時可以從容對人類落毒。

Lisa仲直指狂徒隨時可以向人類下手，呼籲當局正視