陳友黎瑞恩6場音樂劇結束 原形人物太太Pauline登場謝幕

由 陳友 同 黎瑞恩 主演，以陳友太太患病同康復經過作題材嘅音樂劇《娛樂圈夫人》已經完成演出，尾場 彭建新 夫婦 尹光 周吉佩 羅敏莊 黃劍文 湯寶如 劉威煌 蘇志威 仲有 蔡一智 夫婦 都有捧場。

陳友以太太故事改編嘅音樂劇圓滿公演
呢晚劇目主人翁陳太Pauline亦同老公仲有一眾演員齊齊謝幕，事後陳友仲曾過去兩個月綵排同演出都非常難忘，有如整隊人一齊登上長途巴士，呢日到達終站終需分別。而首次參演音樂劇嘅小恩子，更指同大家已有如家人一樣，友哥仲爆佢日夜餵食，大家呢段時間都唔自覺變肥呀。
今次演出令小恩子認為係事業上一次突破

呢日小恩子嘅一對子女亦都現場捧媽咪場，而佢本人就指挑戰音樂劇直情激活腦細胞，過往至驚嘅跳舞同背對白都一一完成，相信係人生之中最驕傲嘅其中一件事，友哥更指如若有舞台表演相關頒獎禮，小恩子一定會獲得提名咁話。
陳友仲大讚小恩子表演非常唔錯

至於原定會到場支持嘅 譚詠麟 就因為身體不適而未有現身，友哥就話勸校長多休息身體重要，下次一定會再有機會咁話。