謝嘉怡兩愛犬遭毒死悲痛求助 驚見生還Leo屙血尿心情沮喪

港姐 謝嘉怡 日前悲憤指同三隻愛犬遠足時，唐狗Peachy同臘腸犬Summer不慎進食有毒藥嘅誘餌先後身亡，令Lisa非常憤怒，更公開要求當局嚴查同加強防範購買毒藥嘅有心人。Lisa當日指已對人性失去信心，不過亦因為當日唔少善心人伸出援手而欣慰。

Lisa兩隻愛犬Summer同Peachy日前中毒陷阱身亡
聲言會為愛犬之死挺身而出嘅Lisa，事件曝光後獲唔少愛狗之人聲援同慰問，Lisa指愛犬離世雖然生活有如被摧毀一樣，不過依然感謝大家支持，稍後會再一一道謝。

佢喺社交平台感謝慰問，亦指正向有關方面了解事件發生原因
Lisa喺社交平台話，自己整日同警方仲有愛護動物協會，嘗試了解落毒事件發生原因，又再一次向關懷佢嘅大家道謝，相信離世愛犬一樣感受到大家嘅愛。
當日Lisa同三隻愛犬行經林村一帶，Peachy同Summer誤食毒餌身亡，不過噚日就發現斑點狗Leo有血尿情況，令佢非常擔心。Lisa指已即時將Leo送到獸醫診所檢查，懷疑當時Leo都亦曾接觸過毒餌，令血液未能凝固，所以未來幾星期要密切觀察情況，Lisa仲沮喪指噩夢似乎仍未過去。

而同行生還嘅Leo，亦出現血尿情況，令Lisa心情再墜谷底，非常擔心

懷疑Leo當時亦曾接觸過毒餌