陳慧嫻40周年演唱會加開1場 開Live同歌迷賀聖誕兼熱身

陳慧嫻 明年1月舉行紅館演唱會，慶祝入行40周年，慧嫻話晒9年冇開個唱，所以反應熱烈，歌迷不停要求加場，慧嫻亦回應歌迷嘅熱情，宣布原定4場騷加開26號場次，增至共5場演出。 

陳慧嫻明年初舉行嘅演唱會宣佈加開一場
慧嫻喺未開騷前準備聖誕禮物送畀歌迷，12月23號晚會喺網上開Live演出，到時會演唱經典歌曲之餘，仲會同演唱會音樂總監何丙大談私密心事，佢仲指何丙將提問好多奇怪私密問題，，好似「例如佢問我，寧願一世冇高潮定係一日一百次.....重有咩放屁呀，唔沖涼定唔洗頭呀...我都唔記得咁，剩係記得大家一齊笑到肚痛。」
Priscilla仲會喺23號晚網上開Live同大家見面

好快紅館騷就正式舉行，慧嫻亦透露籌備進度： 「一定要唱嘅歌、從來未唱過嘅歌，好努力練緊歌詞，仲有好努力排舞中！因為何丙嘅編曲非常之咁....勁！咁就搞到舞步都要好多囉。哈哈，咁我都多謝何丙，個編曲係一定令到大家覺得好正嘅。」
佢仲預先爆話何丙會問及佢好多未曾答過嘅問題

問到慧嫻最期待演唱會時見到咩畫面？慧嫻話，「我睇人哋啲演唱會，見到歌手叫觀眾開電話燈，一片燈海咁陪住唱歌。咁多年來我自己演唱會，都冇試過叫觀眾開燈咁做。我其實好鐘意呢種溫馨令人感動場面，我好希望，如果我開騷個日，由頭到尾...由第一隻歌開始，大家搖住個電話燈到最後一首歌，咁我可能真係會開心到喊。」