陳曉華宣傳獻唱自覺有進步空間 驚喜入圍大馬視后十強成就解鎖

劇集《異空感應》話咁快踏入結局周﹐為咗答謝劇迷支持，一眾演員去到商場作最後宣傳。作為女主角嘅 陳曉華 更鮮有獻唱劇集插曲回饋劇迷支持，呢首《消失的你》原本由聲夢小花 詹天文 演繹，難度有番咁上下，雖然Hera近排都有學唱歌提升唱功，但要現場演繹呢首歌都顯得有啲吃力，唯有以感情搭夠，希望唱出由自己飾演嘅邢可嵐心聲。

Hera宣傳時獻唱劇集歌曲《消失的你》
懷著緊張心情完成演唱嘅Hera，事後亦高呼歌曲難唱，而為咗呢次幾分鐘嘅演出，Hera就算喺內地拍攝新劇《夫妻的博弈》， 一返到香港都抽半日時間練歌，佢仲好多謝觀眾嘅溫暖掌聲鼓勵，更大爆已錄好一段唱歌短片準備派福利。 
Hera指歌曲非常難唱，事前仲特別趕返港練歌

劇中多位演員都有入圍《萬千星輝頒獎典禮》多個獎項，而Hera同阮浩棕更係今屆飛躍進步男女藝員獎嘅大熱，Hera仲對同時入圍馬來西亞視后十強感到喜出望外，佢坦言其餘九強都實力強橫，入圍經已係成就解鎖。
Hera同Nic都入圍台慶頒獎禮嘅最後十強，呢日亦即場拉票

而 阮浩棕 坦言憑《異空感應》入圍最佳男配角十強同飛躍進步獎，係因為劇集熱播令佢更受大家關注，所以無論得邊個獎都一樣高興，當然最好就兩個獎一樣攞呀。
Hera有份競逐大馬視后，令佢指自己成就解鎖

孫漢霖亦有首度現場獻唱劇集主題曲《遇感》，咪睇佢咁精靈原來呢日負傷上陣，火雞早前因為玩高危運動，令腰部近大腿中間嘅肌肉拉傷，大髀無力，令佢行動不便。

火雞日前參與高危運動時受傷，搞到寸步難行